ەرلان قوشانوۆ سالىق كودەكسىنە ەنگىزىلگەن وزگەرىستەر تۋرالى ايتتى

فوتو: ءماجىلىس

ءماجىلىس توراعاسى ەرلان قوشانوۆ سالىق كودەكسىنە ەنگىزىلگەن وزگەرىستەر ەلدىڭ دامۋىنا سەپتىگىن تيگىزەتىنىنە توقتالدى. بۇل تۋرالى qandastar.kz ءماجىلىستىڭ ءباسپاسوز قىزمەتىنە سىلتەمە جاساپ حابارلايدى.

ءماجىلىس توراعاسى ەرلان قوشانوۆتىڭ ايتۋىنشا, بۇگىن وتە مازمۇندى تالقىلاۋ بولدى.

«سالىق كودەكسى – تەك سالىق ماسەلەسى عانا ەمەس, ول ادىلەتتىك ماسەلەسى دەگەندى جاڭا دەپۋتاتتار دۇرىس ايتتى دەپ ويلايمىن. سالىق – وتە سەزىمتال سالا. سەبەبى ءار قازاقستاندىق ازامات, ءار وتباسى, ءار قازاقستاندىق بيزنەسمەن بۇگىنگى ءبىزدىڭ قابىلداعان شەشىمىمىزدى تىكەلەي سەزىنەتىن بولادى. سوندىقتان مەملەكەت باسشىسى ۇكىمەت پەن پارلامەنتكە ءادىل, ءتيىمدى ءارى بولجامدى سالىق جۇيەسىن قۇرۋدى تاپسىردى. بۇگىن ءبىز سول جاڭا سالىق كودەكسىن ءبىرىنشى وقىلىمدا تالقىلادىق. بۇل تالقىلاۋ قىركۇيەك ايىنان بەرى جالعاسىپ كەلە جاتىر. جۇمىس توبىندا وتە كوپ جۇمىس اتقارىلدى. سونىمەن قاتار كەشە ماجىلىستەگى «AMANAT» فراكتسياسىنىڭ وتىرىسىندا دا بۇل ماسەلە جان-جاقتى قارالعان بولاتىن», – دەدى ءماجىلىس توراعاسى.

سالىق كودەكسى فراكتسيا وتىرىستارىندا جان-جاقتى تالقىلاندى.

«ەڭ العاشقىدا ءماجىلىس پەن ۇكىمەت اراسىندا كوپ ماسەلەگە قاتىستى ءارتۇرلى ۇستانىم بولدى. تاقىلاۋ بارىسىندا دەپۋتاتتار ۇكىمەتپەن بىرگە جۇمىس ىستەپ, قىزۋ پىكىرتالاستاردان كەيىن ءبىراز تۇيتكىلدى ماسەلە بويىنشا ورتاق شەشىمگە كەلدى. سولاردىڭ نەگىزگىلەرىنە توقتالىپ وتەيىن.

ءبىرىنشى. قوسىمشا قۇن سالىعىنىڭ شەكتى مولشەرى بويىنشا ورتاق مامىلەگە كەلدىك.

بۇل قوعامدى الاڭداتقان ەڭ وزەكتى ماسەلە بولاتىن. ۇكىمەت ۇسىنعان 15 ميلليون تەڭگە شەكتى مولشەرىن 40 ملن تەڭگەگە كوتەرەتىنىن, ول بويىنشا ۇكىمەتتىڭ ۇستانىمىن جاڭا عانا جۇمانعارين مىرزانىڭ اۋزىنان  ەستىدىڭىزدەر.

ەكىنشى. اركىم ءوز كىرىسىنە ساي  سالىق تولەيدى دەگەن شەشىمگە كەلىپ وتىرمىز.

مىسالى, ساۋدا-ساتتىقپەن, قىزمەت كورسەتۋمەن اينالىساتىن, تاۋار وندىرەتىن شاعىن جانە ورتا بيزنەس ءۇشىن ارنايى سالىق رەجيمى جۇمىس ىستەيتىن بولادى.

ياعني, 4 پايىزدىق سالىق مولشەرىمەن قوسىمشا قۇن سالىعىنسىز كاسىپپەن اينالىسۋ مۇمكىندىگى تولىق ساقتالادى.

وعان قوسا, بۇل مۇمكىندىكتى كەڭەيتۋ ماقساتىمەن «تىيىم سالىنعان كاسىپتەر ءتىزىمى» ازىرلەنەدى.

بۇل  – ۇلكەن شەشىم.

ول دا ارنايى سالىق رەجيمىنىڭ قولدانىلۋ اياسىن ەداۋىر كەڭەيتە تۇسەدى.

ءۇشىنشى. ىرى بيزنەس ءۇشىن جەڭىلدىكتەر قىسقارتىلادى. بۇگىن ول تۋرالى كوپ ايتىلدى.

ال بانكتەر مەن ويىن بيزنەسى ءۇشىن تابىس سالىعى ۇلعايتىلادى.

ءبىر سوزبەن ايتقاندا, قاراپايىم حالىقتىڭ قالتاسىنا سالماق تۇسپەيدى.

جاڭا سالىق ساياساتىنىڭ كوزدەگەنى دە – وسى», – دەدى ەرلان قوشانوۆ.