ەرلان قوشانوۆ ساتباەۆتاعى ەكولوگيالىق ماسەلەنى نازارعا الۋدى تاپسىردى

سونداي-اق ءماجىلىس سپيكەرى ەڭبەك ۇجىمىمەن جانە قالا جۇرتشىلىعىمەن كەزدەسىپ, ولارمەن ەكولوگيا جانە «قارا قار» ماسەلەلەرىن تالقىلادى.

قوشانوۆ اتاپ وتكەندەي, ساتباەۆتاعى ەكولوگيالىق ماسەلەلەردىڭ باستى سەبەبى – كومىر ساپاسى مەن جىلۋ ەلەكتر ستانتسياسىنداعى فيلترلەردىڭ ناشار جۇمىس ىستەۋى. سونداي-اق, ول مەملەكەت باسشىسىنىڭ بۇل جاعدايدان حاباردار ەكەنىن جانە قالانىڭ ەكولوگياسىن لاستاۋدىڭ جۇيەلى سەبەپتەرىن جويۋ ءۇشىن كەشەندى تەكسەرۋ جۇرگىزۋدى تاپسىرعانىن اتاپ ءوتتى. ول وبلىس اكىمدىگى مەن «قازاقمىس» كومپانياسىنىڭ وكىلدەرىنە جاعدايدى جاقسارتۋ جانە ەكولوگيالىق پروبلەمالاردى, سونىڭ ىشىندە ساتباەۆتاعى جىلۋ ەلەكتر ستانتسياسىن گازعا كوشىرۋ بويىنشا كەشەندى شارالاردى شۇعىل تۇردە قابىلداۋ تۋرالى تالاپ قويدى.

«ەسكى فيلترلەر ساپاسىز كومىردەن شىققان كۇل قالدىقتارىن ۇستاپ تۇرۋعا شاماسى جەتپەي وتىر. بۇل قالا ەكولوگياسىنا جانە تۇرعىنداردىڭ دەنساۋلىعىنا كەرى اسەر ەتۋدە. مۇنداي ماسەلەنى قىسقا مەرزىمدە شەشۋ مۇمكىن ەمەس ەكەنى تۇسىنىكتى. بىراق قازىر بارلىق سەبەپتى تولىق انىقتاپ, كەلەسى جىلىتۋ ماۋسىمىنا دەيىن ناقتى شارالار قابىلداۋىمىز قاجەت. كاسىپورىن باسشىلىعى, ەنەرگەتيكا مينيسترلىگى جانە اكىمدىك بۇل ماسەلەنى بىرلەسىپ, ۋاقىت سوزدىرماي شەشۋگە ءتيىس. «قارا قار» سياقتى كەلەڭسىز قۇبىلىستاردان تۇبەگەيلى ارىلۋعا بار كۇشىمىزدى سالۋىمىز قاجەت. ءوز كەزەگىندە, ءماجىلىس دەپۋتاتتارى جاعدايدى باقىلاۋدا ۇستايتىن بولادى», – دەدى ءماجىلىس توراعاسى.

ءماجىلىس دەپۋتاتتارى جەزقازعان قالاسىنداعى گيدروتسەحتاعى جۇمىس بارىسىمەن دە تانىستى. ەرلان قوشانوۆ اتاپ وتكەندەي, جەزقازعاندى  اۋىز سۋمەن قامتاماسىز ەتۋ ءالى كۇنگە دەيىن ەڭ وزەكتى ماسەلەنىڭ ءبىرى بولىپ وتىر. 2021 جىلى مەملەكەت باسشىسى بۇل تۇيتكىلدى شەشۋدى تاپسىرعان بولاتىن. قازىرگى ۋاقىتقا دەيىن بىرقاتار شارۋا اتقارىلعانىمەن, ءالى دە كوپتەگەن ماسەلە بار.

«جەزقازعان تۇرعىندارى ساپالى  اۋىز سۋعا مۇمكىندىگىنشە تەزىرەك قول جەتكىزۋى كەرەك. ول حالىقتىڭ دەنساۋلىعى مەن وڭىردەگى احۋالعا تىكەلەي اسەر ەتەدى. بۇل – بارلىق تاراپتاردىڭ, مينيسترلىكتەر مەن اكىمدىكتىڭ ورتاق مىندەتى. ءوز كەزەگىندە دەپۋتاتتار دا وسى جۇمىسقا بەلسەنە اتسالىسۋعا دايىن», – دەدى ەرلان قوشانوۆ.

Zakon.kz جازعانداي, پالاتا سپيكەرى جەزقازعاندى اۋىز سۋمەن قامتاماسىز ەتۋ ماسەلەسىن جەر استى سۋ كوزدەرىن پايدالانۋ ارقىلى ەكى سۋ قۇبىرى – ەسقۇلا جانە ءۇيتاس-ايدوس سۋ جۇيەلەرى ەسەبىنەن شەشۋ جوسپارلانىپ وتىرعانىن اتاپ ءوتتى. بۇگىنگى تاڭدا قاجەتتى جوبالىق قۇجاتتاردىڭ ءبارى ازىرلەنىپ, ناقتى جۇمىس كولەمى بەلگىلەنگەن, باستاپقى قارجى بولىنگەن. كەزدەسۋ بارىسىندا سۋ رەسۋرستارى جانە يرريگاتسيا مينيسترلىگى مەن وبلىس باسشىلىعى وكىلدەرىنىڭ قاتىسۋىمەن بارلىق ماسەلە جان-جاقتى تالقىلاندى. كەزدەسۋ قورىتىندىسى بويىنشا ءماجىلىس توراعاسى 2025 جىلى بارلىق ماسەلەنى شەشۋگە جانە جەزقازعاندى اۋىز سۋمەن قامتاماسىز ەتۋگە باعىتتالعان ناقتى قادامدار جاسالۋعا ءتيىس ەكەنىن ەرەكشە اتاپ ءوتتى.

ساپار بارىسىندا دەپۋتاتتار ساتباەۆ قالاسىنداعى وقۋشىلار سارايىنىڭ جۇمىسىمەن تانىسىپ, جەزقازعاندا سالىنىپ جاتقان دەنە شىنىقتىرۋ-ساۋىقتىرۋ كەشەنىندە وبلىس بەلسەندىلەرىمەن, سونداي-اق جەزقازعان جۇرتشىلىعىمەن كەزدەستى.