«ەرلى-زايىپتىلار بالا اسىراپ الا الادى»: تايلاند كورولى ءبىر جىنىستىلاردىڭ نەكەسىن تىركەۋگە رۇقسات بەردى

فوتو: pixabay.com

تايلاند كورولى ءبىر جىنىستىلاردىڭ نەكەسى تۋرالى زاڭعا قول قويدى. وسىلايشا تايلاند ءبىر جىنىستىلاردىڭ نەكەلەسۋىن زاڭداستىرعان وڭتۇستىك-شىعىس ازياداعى العاشقى مەملەكەت بولدى. بۇل تۋرالى qandastar.kz اقپارات اگەنتتىگى BBC باسىلىمىنا سىلتەمە جاساپ حابارلايدى.

تايلاند پارلامەنتىنىڭ جوعارعى پالاتاسى بيىل ماۋسىمدا ءبىر جىنىستىلاردىڭ نەكەسى تۋرالى زاڭدى قولدادى. ءسويتىپ بۇل كۇنى كەشە مونارحيانىڭ رەسمي گازەتىندە جاريالاندى. زاڭ 2025 جىلدىڭ 22 قاڭتارىندا كۇشىنە ەنەدى.

زاڭدى نەكە ەندى تەك ەر مەن ايەلدىڭ ەمەس, ەكى ادامنىڭ ۇيلەنۋى دەپ ەسەپتەلمەك. ءبىر جىنىستى جۇپتار ەرلى-زايىپتىلارعا بەرىلەتىن سالىق جەڭىلدىكتەرىن پايدالانۋعا, ءبىر-ءبىرىنىڭ مۇلكىن مۇراگەرلىككە الۋعا جانە جۇبايى ەسىن جوعالتان جاعدايدا ونى ەمدەۋگە كەلىسىم بەرۋگە قۇقىلى.

سونداي-اق ءبىر جىنىستى ەرلى-زايىپتىلار بالا اسىراپ الا الادى. الايدا دەپۋتاتتار بەيىندى كوميتەتتىڭ «اكە مەن شەشە» دەگەن ءسوزدىڭ ورنىنا «اتا-انا» ءسوزىن قولدانۋ تۋرالى ۇسىنىسىن قابىلدامادى.

«بۇگىن ءبىز نەكە تۋرالى كۋالىكتەرگە اتىمىزدى جازىپ قانا قويماي, تاريحتىڭ جاڭا پاراعىن ءوزىمىز جازامىز. ماحاببات ءبىزدىڭ كىم بولىپ تۋعانىمىزعا قارامايدى. بۇل تەڭدىك پەن ادامدىق قادىر-قاسيەتتىڭ مەرەكەسى. زاڭ كۇشىنە ەنگەن كۇنى مىڭنان استام لگبت جۇپتارى ۇيلەنۋ تويىن جاسايدى», – دەدى تايلاندتاعى لگبت قۇقىقتارىن قورعاۋشى ەنن چۋماپورن.

تايلاندتا ءبىر جىنىستى نەكەنى زاڭداستىرۋ 10 جىلعا جۋىق ۋاقىتقا سوزىلدى. مۇندا حالىقتىڭ باسىم بولىگى ءبىرجىنىستى نەكەنى قولدايدى. وعان وتكەن جىلدىڭ سوڭىندا ۇيىمداستىرىلعان ساۋالناما ناتيجەسى دالەل. رەسپوندەنتتەردىڭ 96,6%-ى ءبىر جىنىستى نەكەنى قولداعان. الايدا ەل بيلىگى مۇنى قۇپتامادى.

ءبىرجىنىستى نەكەنى زاڭداستىرۋدى قولدايتىن پارتيالار تەك سوڭعى سايلاۋدا, ياعني 2023 جىلدىڭ تامىزىندا پارلامەنتكە كىردى.

بۇعان دەيىن قازاقستاندا لگبت ناسيحاتىنا تىيىم سالۋ تۋرالى پەتيتسيانى ءىشىنارا ماقۇلداۋ تۋرالى شەشىم قابىلدانعان ەدى.