«Erli-zaıyptylar bala asyrap ala alady»: Taıland koroli bir jynystylardyń nekesin tirkeýge ruqsat berdi

Foto: pixabay.com

Taıland koroli bir jynystylardyń nekesi týraly zańǵa qol qoıdy. Osylaısha Taıland bir jynystylardyń nekelesýin zańdastyrǵan ońtústik-shyǵys Azııadaǵy alǵashqy memleket boldy. Bul týraly qandastar.kz aqparat agenttigi BBC basylymyna silteme jasap habarlaıdy.

Taıland parlamentiniń joǵarǵy palatasy bıyl maýsymda bir jynystylardyń nekesi týraly zańdy qoldady. Sóıtip bul kúni keshe monarhııanyń resmı gazetinde jarııalandy. Zań 2025 jyldyń 22 qańtarynda kúshine enedi.

Zańdy neke endi tek er men áıeldiń emes, eki adamnyń úılenýi dep eseptelmek. Bir jynysty juptar erli-zaıyptylarǵa beriletin salyq jeńildikterin paıdalanýǵa, bir-biriniń múlkin muragerlikke alýǵa jáne jubaıy esin joǵaltan jaǵdaıda ony emdeýge kelisim berýge quqyly.

Sondaı-aq bir jynysty erli-zaıyptylar bala asyrap ala alady. Alaıda depýtattar beıindi komıtettiń «áke men sheshe» degen sózdiń ornyna «ata-ana» sózin qoldaný týraly usynysyn qabyldamady.

«Búgin biz neke týraly kýálikterge atymyzdy jazyp qana qoımaı, tarıhtyń jańa paraǵyn ózimiz jazamyz. Mahabbat bizdiń kim bolyp týǵanymyzǵa qaramaıdy. Bul teńdik pen adamdyq qadir-qasıettiń merekesi. Zań kúshine engen kúni myńnan astam LGBT juptary úılený toıyn jasaıdy», – dedi Taılandtaǵy LGBT quqyqtaryn qorǵaýshy Enn Chýmaporn.

Taılandta bir jynysty nekeni zańdastyrý 10 jylǵa jýyq ýaqytqa sozyldy. Munda halyqtyń basym bóligi birjynysty nekeni qoldaıdy. Oǵan ótken jyldyń sońynda uıymdastyrylǵan saýalnama nátıjesi dálel. Respondentterdiń 96,6%-y bir jynysty nekeni qoldaǵan. Alaıda el bıligi muny quptamady.

Birjynysty nekeni zańdastyrýdy qoldaıtyn partııalar tek sońǵy saılaýda, ıaǵnı 2023 jyldyń tamyzynda parlamentke kirdi.

Buǵan deıin Qazaqstanda LGBT nasıhatyna tyıym salý týraly petıııany ishinara maquldaý týraly sheshim qabyldanǵan edi.