ەرمۇحامەد ماۋلەننىڭ ايتقانى كەلە باستادى: قازاقستاندىق ەكى تورەشى كەلىسىلگەن ويىن وتكىزدى دەگەن كۇدىككە ءىلىندى

تيمۋر كۋماشەۆ پەن گەورگي چەحوۆسكي ماۋسىمنىڭ سوڭىنا دەيىن جۇمىسىنان شەتتەتىلدى. 

قفف تورەلىك جانە ينسپەكتسيا دەپارتامەنتىنىڭ ديرەكتورى نۋنۋ الەشاندرە پاررەيرا دە كاشترۋ قازاقستان پرەمەر-ليگاسىنىڭ 16-تۋرى اياسىندا وتكەن «تۇران» مەن «قىزىلجار» ماتچىنداعى تورەشىنىڭ داۋلى شەشىمىنە بايلانىستى رەسمي تۇسىنىكتەمە بەردى, دەپ جازادى  qandastar.kz     اlash.kz ۇلتتىق پورتالى قفف-نىڭ باسپاسوز قىزمەتىنە سىلتەمە جاساپ.

تورەلىك جانە ينسپەكتسيا دەپارتامەنتى قوعامدا ۇلكەن رەزونانس تۋدىرعان ەپيزودتى قاراپ, باس تورەشى تيمۋر كۋماشەۆ پەن ۆيدەوكومەكشى گەورگي چەحوۆسكيدىڭ كەلىسىلگەن ويىندارعا قاتىسى بولۋى مۇمكىن دەگەن قفف ينتەگريتي وفيتسەرىنىڭ مالىمەتىن زەرتتەدى. 

12 شىلدەدە وتكەن ماتچتىڭ 84-مينۋتىنداعى ەپيزود جان-جاقتى تالدانىپ, بەينەماتەريالدار قارالدى. تورەشىلەردىڭ تۇسىنىكتەمەلەرى مەن ساراپشىلار پىكىرى تىڭدالدى. 

– تەكسەرۋ بارىسىندا «تۇران» قورعاۋشىسى شابۋىلشىنى ەكى قولىمەن ۇستاعانى انىقتالدى. الايدا شابۋىلشىنىڭ كەيىنگى ارەكەتى: ادەيى قۇلاۋ جانە شىنايى جاناسۋعا ساي كەلمەيتىن سيمۋلياتسيا رەتىندە باعالاندى. 11 مەترلىك ايىپ دوبىن بەلگىلەۋگە سەبەپ بولعانىمەن, بۇل جاعدايدا ەڭ دۇرىس شەشىم – پەنالتي بەلگىلەمەۋ ەدى. باس تورەشى مەن VAR تاراپى ەپيزودتى جەتكىلىكتى كاسىبي دەڭگەيدە باعالامادى. سونداي-اق تورەشىلەر بريگاداسىنىڭ ءوزارا ۇيلەسىمدى ارەكەت ەتپەۋى سالدارىنان نەگىزسىز شەشىم قابىلدانعانى تىركەلدى, – دەلىنگەن رەسمي تۇسىنىكتەمەدە. 

بۇعان قوسا, تيمۋر كۋماشەۆ وسىعان دەيىن قفف ينتەگريتي وفيتسەرىنىڭ ۇسىنىسىمەن ءبىر ايعا تورەشىلىكتەن ۋاقىتشا شەتتەتىلگەن بولاتىن. ال گەورگي چەحوۆسكيگە قاتىستى تەرگەۋ جۇرگىزىلگەنگە دەيىن ونى دا قىزمەتىنەن شەتتەتۋ ۇسىنىلعان.

اتالعان ەكى تۇلعا دا كەلىسىلگەن ويىندارعا قاتىسى بار دەگەن كۇدىكپەن جۇرگىزىلىپ جاتقان تەرگەۋگە ىلىككەن.

قفف تورەشىلىك جۇيەسىنە دەگەن سەنىمدى ساقتاۋ جانە ونىڭ بەدەلىن قورعاۋ ماقساتىندا, سونداي-اق ينتەگريتي وفيتسەرىنىڭ ۇسىنىمىنا سايكەس, تيمۋر كۋماشەۆ پەن گەورگي چەحوۆسكي 2025 جىلعى ماۋسىمنىڭ سوڭىنا دەيىن قفف اياسىنداعى ماتچتاردان شەتتەتىلدى.