«ەرتىس» شاحتاسىندا 4 ادام قازا تاپتى

فوتو: depositphotos.com

جازاتايىم وقيعا كەشە, 31 تامىزدا ساعات 17.30 شاماسىندا KAZ Minerals كومپانياسىنا قاراستى «ەرتىس» شاحتاسىندا بولعان, دەپ حابارلايدى Skifnews.kz اقپارات پورتالى. 

«شاحتادان 4 ادامنىڭ ءمايىتى تابىلدى. ولاردىڭ ەكەۋى كاسىپورىننىڭ, ەكەۋى مەردىگەر ۇيىمنىڭ جۇمىسشىلارى بولعان. الدىن الا دەرەك بويىنشا جۇمىسشىلار گازدان ۋلانىپ قالعان», – دەپ حابارلادى KAZ Minerals كومپانياسىنىڭ ءباسپاسوز قىزمەتىنەن.

وقيعانىڭ ءمان-جايى مەن سەبەپتەرى انىقتالۋدا. تەرگەۋ جونىندەگى ارنايى كوميسسيا قۇرىلدى.

KAZ Minerals كومپانياسى ديرەكتورلار كەڭەسىنىڭ توراعاسى ولەگ نوۆاچۋك قايعىلى وقيعانى تەرگەۋگە جەكە قاتىسۋ ءۇشىن «ەرتىس» شاحتاسىنا باردى.

«كاسىپورىن باسشىلىعى مەن ۇجىمى قازا بولعانداردىڭ تۋىستارى مەن جاقىندارىنا قايعىرا كوڭىل ايتادى. كومپانيا مارقۇمداردىڭ وتباسىلارىنا جان-جاقتى كومەك كورسەتەدى», – دەلىنگەن اقپاراتتا.

شقو تجد دەرەگىنشە, تاعى ءبىر ادام شقو گلۋبوكوە اۋداندىق اۋرۋحاناسىنا جاتقىزىلعان. دارىگەرلەر ونىڭ جاعدايىن تۇراقتى دەپ باعالاپ وتىر.