ەرتىسكە كۋرچاتوۆ قالاسىنىڭ كارىز سۋى اعىپ جاتىر

فوتو: اشىق دەرەككوز

اباي وبلىسى كۋرچاتوۆ قالاسىنان اعىپ شىعاتىن قالدىق سۋلار ەرتىس وزەنىنە قۇيىلىپ جاتقانى انىقتالدى. جەرگىلىكتى كوممۋنالدىق مەكەمە شاھارداعى قۇبىرلاردىڭ توزىپ كەتكەنىن ايتادى. بۇل جاعداي ەرتىستىڭ سۋىن تۇتىنىپ وتىرعان پاۆلودار وبلىسىنىڭ حالقىنا ايتارلىقتاي قاۋىپ ءتوندىرىپ وتىر, دەپ جازدى qandastar.kz

پاۆلودار وبلىسى جەر قويناۋىن پايدالانۋ, قورشاعان ورتا جانە سۋ رەسۋرستارى باسقارماسى كۋرچاتوۆ قالاسىنداعى كارىز سۋلارى ەرتىس وزەنىنە قۇيىلىپ جاتقانىن راستادى. بەلگىلى بولعانداي, «كۋرچاتوۆ ۆودوكانال» مەكەمەسىنە قاراستى كارىز جۇيەسىنىڭ جەراستىنداعى قۇبىرلارى جارىلىپ, سالدارىنان قالدىق سۋ وزەنگە تولاسسىز اعىپ كەتىپ جاتىر.

– كۋرچاتوۆ قالاسىنان ەرتىس وزەنىنە اعىندى سۋلاردىڭ اعۋى تۋرالى بەينەماتەريال بويىنشا اباي وبلىسىنىڭ ەكولوگيا دەپارتامەنتى شىعارىندىلار ورنىنا ارنايى باردى. اعىندى سۋلاردى اعىزۋ دەرەگى راستالدى. وسىعان وراي شجق «كۋرچاتوۆ ۆودوكانال» كمك-عا قاتىستى تەكسەرىس جۇرگىزىلەتىن بولادى, – دەپ حابارلادى باسقارمادان.

Türkistan.kz حابارلاعانداي,  پاۆلودار قالالىق سانيتارلىق-ەپيدەميولوگيالىق باقىلاۋ باسقارماسى ەرتىس وزەنىنەن حيميالىق, باكتەريولوگيالىق جانە پارازيتولوگيالىق كورسەتكىشتەرى بويىنشا سۋ سىنامالارىن الدى. تالداۋ ناتيجەلەرى شامامەن بەيسەنبى كۇنى بەلگىلى بولادى.

ايتىپ ءوتۋ كەرەك, كۋرچاتوۆ قالاسى ەرتىس وزەنىنىڭ جوعارعى جاعىندا, پاۆلودار وبلىسىنا جاقىن ورنالاسقان.