جاڭالىقتار
«ەسەك, تۇر اياعىڭدى باس, ءجۇر!»: تۇركىستان وبلىسىندا ەر ادام ءوز اكەسىن اياۋسىز ۇرىپ, بالاعات سوزدەر ايتقان
الەۋمەتتىك جەلىدە تاراعان ۆيدەودان ەر ادامنىڭ اياعىنا تۇرا الماعان قارياعا جەكىپ سويلەپ, ونى جۇلقىپ جاتقانىن كورۋگە بولادى. ءتىپتى ساباپ جاتقان دىبىستار ەستىلگەن, دەپ حابارلايدى Qandastar.kz.
جەلى قولدانۋشىلارىنىڭ ايتۋىنشا, جاعاۇستاتارلىق جاعداي تۇركىستان وبلىسىنىڭ شاردارا قالاسىندا بولعان.
ەر ادام جۋىندىرعالى جاتقان قارتتى بالاعاتتاپ, “ەكى قابىرعاڭدى سىندىرامىن” دەپ قورقىتتى. ەندى ءبىر كادردان اقساقالدىڭ جولدىڭ ۇستىندە اياققا تۇرا الماي وترىعانىن كورۋگە بولادى.
“تۇر, تۇرمايسىڭ با, تاعى ۇرامىن. ەسەك, تۇر اياعىڭدى باس, ءجۇر”, – دەپ ايەلدى كومەككە شاقىرىپ, قاريانى سۇيرەپ الىپ كەتتى.
اۆتور ۆيدەونى جاسىرىن تۇسىرگەن. ءۇشىنشى كادردا ادامدارىڭ نە ىستەپ جاتقانى انىق كورىنبەگەنىمەن, سوققىنىڭ دىبىسى شىعىپ جاتتى.
اۋزىنان اق يت كىرىپ, كوك يت شىققان ەر ادام قارتتى تۇرعىزا الماي الەك. ونىڭ جانىندا جۇرگەن ايەلدىڭ دە قاريانى ۇرىپ-سوعىپ, دورەكىلىك تانىتقانى ايقىن كورىنەدى.
تۇركىستان وبلىسى پوليتسيا دەپارتامەنتى بولعان جاعدايعا قاتىستى قىلمىستىق ءىس قوزعادى.
“كۇدىكتى ۇستالىپ, ۋاقىتشا ۇستاۋ يزولياتورىنا قاماۋعا الىندى. بولعان وقيعانىڭ ءمان-جايى انىقتالىپ جاتىر. قاجەتتى جەدەل-تەرگەۋ شارالارى جۇرگىزىلۋدە, ونىڭ ناتيجەلەرى بويىنشا ءتيىستى شەشىم قابىلداناتىن بولادى. قىلمىستىق پروتسەسسۋالدىق كودەكستىڭ 201-بابىنا سايكەس تەرگەۋ مۇددەسىندەگى وزگە دە اقپاراتتار جاريا ەتىلۋگە جاتپايدى”, – دەپ مالىمدەدى پوليتسيا.
بۇل ۆيدەو جەلى قولدانۋشىلارىنىڭ جاعاسىن ۇستاتتى. ولار ۇلكەن كىسىگە قول كوتەرگەن ەركەكتى جەردەن الىپ, جەرگە سالدى.
“اتاڭا نە ىستەسەڭ, الدىڭا سول كەلەدى. كورىپ وسكەن سوڭ ءوز بالاڭ دا سونى قايتارسىن, ارسىز”, “انانىڭ قارعىسى بوق, اكەنىڭ قارعىسى وق. اللا بەرسىن جازاسىن”, “وسى مالدى اسىرايمىن دەپ بۇل اكە قيىن زاماندا نە كورمەدى ەكەن? قارتايعاندا زەينەتىن كورەمىن دەپ ويلادى عوي”, “قاسىندا ۇلدارى ءجۇر عوي,ءدال وسى كۇندى الدىڭا الىپ كەلەدى, اسىقپا, حايۋان”, “نەگە سونشا قاتىگەز”, “اللا ساقتاسىن! جۇرەگىمنىڭ اۋىرعانى-اي”, – دەپ قىنجىلدى جەلىدەگىلەر.
