«ەش كوتەرىلىس كەرەك ەمەس»: تالعاردا كوز جۇمعان 16 جاستاعى ءجاسوسپىرىمنىڭ اكەسى قازاقستاندىقتارعا ۇندەۋ جاسادى

فوتو: اشىق دەرەككوز

شەرزات پولاتتىڭ اكەسى قازاقستاندىقتارعا قولداۋ كورسەتكەنى ءۇشىن العىس ءبىلدىردى. سونداي-اق ول جەرلەستەرىنەن ارانداتۋشىلىققا بوي بەرمەۋدى سۇرادى. بۇل تۋرالى Stan.kz اقپارات اگەنتتىگى حابارلايدى.

«قۇرمەتتى قازاق ەلى! سىزدەردىڭ الدارىڭىزدا باسىمدى يەمىن. كوپ-كوپ راحمەت سىزدەرگە. مەنى قولداپ, بالام ءۇشىن قول ۇشىن بەرىپ جاتىرسىزدار. مەن قوناەۆ قالاسىنىڭ ىشكى ىستەر دەپارتامەنتىنەن كەلدىم. ول جەردە ءىس وڭ جاعىنان قارالىپ جاتىر. بىزگە ادۆوكاتتار كەلىپ كومەكتەسىپ جاتىر. مارقۇم بولعان سالتاناتتىڭ اعاسىنىڭ دا كومەگى بار, ول كىسىگە دە العىسىمدى ايتامىن, — دەدى قارجاۋباي نۇرىموۆ.

ول حالىقتان ەشقانداي ميتينگكە شىقپاۋدى ءوتىندى. مارقۇمنىڭ اكەسى قانتوگىس بولماعانىن قالايدى.

ء«بىر شوعىرلانعان ادامدار كەلىپ, سول ءساتتى دۇشپاندارىم پايدالانۋى مۇمكىن. كوتەرىلىس جاساپ, مەنى اياقتان شالىپ, باۋىرىما قاستاندىق جاساي ما دەيمىن. سول سەبەپتى حالقىم ءوتىنىپ سۇرايمىن: ەش كوتەرىلىس كەرەك ەمەس. ءوز قاعيدام – زاڭ اياسىندا دۇرىس ءارى ءادىل شەشىم سۇرايمىن. ارتىق ەشتەڭە سۇرامايمىن. شىنى كەرەك, قانداي دا ءبىر اقپاراتتار بولىپ جاتسا, ءوزىم عانا بولىسەمىن. ۆيدەوجازباعا, اۋديوجازبا, فوتولارعا سەنبەڭىزدەر. اقىلى تۇردە ادۆوكات جالداۋعا تۋرا كەلەدى. ءوزىم ەشكىمنەن قورىقپايمىن. بىراق وتباسىمنىڭ قاۋىپسىزدىگى ءۇشىن الاڭدايمىن. ولار مەنى بىرنەشە رەت قورقىتىپ, الىپ كەتتى. اعايىندار, ارانداتۋشىلىققا بوي بەرمەيىك, بالام قايتىس بولدى. ەندى باسقا بالالار دا وسىلاي قينالماسا ەكەن دەيمىن», – دەدى ول.

ەسكە سالايىق, بۇعان دەيىن تالعاردا جاپپاي توبەلەس بولىپ, سالدارىنان 16 جاستاعى ءجاسوسپىرىم كوز جۇمعان ەدى. كەيىننەن جاعدايدىڭ ءمان-جايى انىقتالدى. جانجال ءجاسوسپىرىمنىڭ وتباسى جۇمىس ىستەيتىن دۇكەندە باستالعان. تۋىستارىنىڭ ايتۋىنشا, ساۋدا نۇكتەسىنە كەلگەن ساتىپ الۋشى سىرا الىپ, اقشاسىن تولەۋدەن باس تارتقان. وسىدان كەيىن توبەلەس باستالعان. پروكۋراتۋرا جەتى كۇدىكتىنىڭ قاماۋعا الىنعانىن حابارلادى.