«Esh kóterilis kerek emes»: Talǵarda kóz jumǵan 16 jastaǵy jasóspirimniń ákesi qazaqstandyqtarǵa úndeý jasady

Foto: ashyq derekkóz

Sherzat Polattyń ákesi qazaqstandyqtarǵa qoldaý kórsetkeni úshin alǵys bildirdi. Sondaı-aq ol jerlesterinen arandatýshylyqqa boı bermeýdi surady. Bul týraly Stan.kz aqparat agenttigi habarlaıdy.

«Qurmetti qazaq eli! Sizderdiń aldaryńyzda basymdy ıemin. Kóp-kóp rahmet sizderge. Meni qoldap, balam úshin qol ushyn berip jatyrsyzdar. Men Qonaev qalasynyń ishki ister departamentinen keldim. Ol jerde is oń jaǵynan qaralyp jatyr. Bizge advokattar kelip kómektesip jatyr. Marqum bolǵan Saltanattyń aǵasynyń da kómegi bar, ol kisige de alǵysymdy aıtamyn, — dedi Qarjaýbaı Nurymov.

Ol halyqtan eshqandaı mıtıngke shyqpaýdy ótindi. Marqumnyń ákesi qantógis bolmaǵanyn qalaıdy.

«Bir shoǵyrlanǵan adamdar kelip, sol sátti dushpandarym paıdalanýy múmkin. Kóterilis jasap, meni aıaqtan shalyp, baýyryma qastandyq jasaı ma deımin. Sol sebepti halqym ótinip suraımyn: esh kóterilis kerek emes. О́z qaǵıdam – zań aıasynda durys ári ádil sheshim suraımyn. Artyq eshteńe suramaımyn. Shyny kerek, qandaı da bir aqparattar bolyp jatsa, ózim ǵana bólisemin. Vıdeojazbaǵa, aýdıojazba, fotolarǵa senbeńizder. Aqyly túrde advokat jaldaýǵa týra keledi. О́zim eshkimnen qoryqpaımyn. Biraq otbasymnyń qaýipsizdigi úshin alańdaımyn. Olar meni birneshe ret qorqytyp, alyp ketti. Aǵaıyndar, arandatýshylyqqa boı bermeıik, balam qaıtys boldy. Endi basqa balalar da osylaı qınalmasa eken deımin», – dedi ol.

Eske salaıyq, buǵan deıin Talǵarda jappaı tóbeles bolyp, saldarynan 16 jastaǵy jasóspirim kóz jumǵan edi. Keıinnen jaǵdaıdyń mán-jaıy anyqtaldy. Janjal jasóspirimniń otbasy jumys isteıtin dúkende bastalǵan. Týystarynyń aıtýynsha, saýda núktesine kelgen satyp alýshy syra alyp, aqshasyn tóleýden bas tartqan. Osydan keıin tóbeles bastalǵan. Prokýratýra jeti kúdiktiniń qamaýǵa alynǵanyn habarlady.