توقاەۆ اناسى جايلى ەستەلىكتەرمەن ءبولىستى

فوتو: تokayev_online

پرەزيدەنت قاسىم-جومارت توقاەۆ انالار كۇنىمەن قۇتتىقتاپ, اناسى تۇرار شابارباەۆانىڭ ءومىرى مەن تاربيەسى تۋرالى ەستەلىكتەرىن ءبولىستى, دەپ جازدى qandastar.kz

«بۇگىن – انالار كۇنى! وسى ورايدا انام تۇرار شابارباەۆا تۋرالى از-كەم ەستەلىكپەن بولىسكىم كەلەدى. ءتورت بالالى ءبىزدىڭ وتباسى قاراپايىم تۇردى. انام ۇزاق ۋاقىت بويى بەلگىلى سەبەپتەرمەن جۇمىس ىستەمەدى, ول كىسى ءۇي جۇمىسىن اتقاردى. جالعىز اسىراۋشىمىز اكەي. ايلىق جالاقىدان بولەك, ول كەي-كەيدە ماقالالارى مەن كىتاپتارىنا قالاماقى الاتىن. مۇنداي كۇندەرى ءبىزدىڭ ۇيدە ناعىز مەرەكە ورنايدى. شەشەي ول كەزدە جاس ايەل بولا تۇرا, كوپ نارسەدەن, ونىڭ ىشىندە اشەكەي زاتتار مەن قىمبات كيىمدەردەن تارتىناتىن. ارينە, ءساندى كيىنىپ, اسەم اشەكەيلەر تاققىسى كەلگەنى تابيعي عوي, الايدا بار ءومىرىن پەرزەنتتەرىنە ارناپ, انالىق پارىزىن قىسقا عۇمىرىنىڭ اقىرىنا دەيىن اتقارىپ ءوتتى. ءتىپتى, قىمبات دۇنيەلەر الاتىنداي مۇمكىندىك تۋعان كەزدە دە, وزىنە ۇناعان زاتتاردى نەمەرەلەرىنە اپەرۋمەن شەكتەلەتىن», – دەدى توقاەۆ.

پرەزيدەنت اناسىنىڭ اقىل-پاراساتى مەن رۋحاني تاربيەسى ومىرلىك ۇستانىمدارىنا ۇلكەن اسەر ەتكەنىن جەتكىزدى.

ء«وز ءومىرىمنىڭ كەڭەس وداعى تاراۋىمەن تۇسپا-تۇس كەلگەن سىندارلى ساتىندە انامنىڭ باتىل قولداعانى ەشقاشان ۇمىتىلمايدى. سول ءبىر قاۋىرت كۇندەرى ماسكەۋدە قالىپ, رەسەي مەملەكەتىنىڭ سىرتقى ىستەر مينيسترلىگىندە قىزمەت ىستەۋ نەمەسە ەلگە قايتىپ ورالۋدى انىقتاۋ قاجەت ەدى. سوندا انامنىڭ «اكەڭ ءتىرى بولسا, ساعان بىردەن قازاقستاندا قىزمەت ەتۋ كەرەك دەر ەدى» دەپ ايتقانى ەسىمدە. بۇل ءسوز بۇيرىقتاي بولىپ ەستىلدى. شەشەمىز, ارينە, كەيبىر شەنەۋنىكتەردىڭ اياقاستىنان قيساپسىز بايىپ شىعا كەلىپ جاتقانىن ءبىلدى, بىراق مۇنداي تىرشىلىكتىڭ بايانسىز جانە اقىرى جاقسىلىققا اپارمايتىنىن جالىقپاي ايتىپ وتىردى», – دەدى مەملەكەت باسشىسى.

سونىمەن قاتار پرەزيدەنت اناسىنىڭ قيىن ساتتەردە باتىل قولداۋ بىلدىرگەنىن جانە ءاردايىم ۇلىنىڭ تازالىق پەن ادىلدىك جولىندا بولۋىن قالاعانىن ايتتى.

ء«وزى دە قاراپايىم تىرلىك كەشتى, كوزى جۇمىلعانشا كوپ نارسەدەن ءوزىن شەكتەپ وتىردى. ىلعي دا ەل الدىندا ۇياتقا قالماۋ ءۇشىن ءوزىمدى تازا ۇستاۋدى, ەشقاشان كورسەقىزارلىققا بارماۋدى ايتىپ كەڭەس بەرەتىن. انام دا ۇنەمى مەنى قولدايتىن. بالا كۇنىمنەن مەن ونىڭ كوپتەگەن ماعىناسى تەرەڭ مازمۇندى اڭگىمەلەرىن, وي-پىكىرى مەن پايىمداۋلارىن تىڭداپ ءوستىم عوي. اڭگىمەنى جاقسى ايتاتىن جانە مەنىڭ دە ىقىلاستانا تىڭدايتىنىمدى سەزگەن بولار, ءسويتىپ ومىرلىك دۇنيەتانۋىما ولشەۋسىز ىقپال ەتتى. جان-جاعىما بايىپتى قاراپ, ۇستامدى بولۋعا, جاقسىنى ۇيرەنۋگە جانە ودان تەك پايدالىسىن الۋعا ۇيرەتتى. «كۇنى بويى جانە كەشكە نەمەن اينالىساتىنىڭدى تاڭەرتەڭنەن ويلاۋ كەرەك. جيناقى ءجۇرۋ قاجەت, اسىپ-ساسقان ادام ساتسىزدىككە ۇشىرايدى» دەپ ءجيى ايتاتىن», – دەدى قاسىم-جومارت توقاەۆ.

توقاەۆ انالاردىڭ مەيىرىمى مەن جاناشىرلىعىنىڭ ولشەۋسىز ەكەنىن ەسكە سالىپ, بارشا جۇرتتى انالارىن قۇرمەتتەۋگە شاقىردى.

ء«بىزدىڭ انامىز ۇساق-تۇيەك نارسەگە دەيىن تۇگەل ءبىلۋدى قاجەت سانادى. ول كىسىنىڭ قاتىسۋىنسىز اتا-انالار جينالىسى وتكەن ەمەس. ءتورت بالاسىنىڭ وقىتۋشىلارىنىڭ ءبارىن بىلەتىن. بالالىق تەنتەكتىگىمىزگە, جەتكىنشەكتىك قۋانىش پەن كۇيىنىش-سۇيىنىشىمىزگە قاتىستى جايلاردى ءتۇپ-تۇگەل سەزىنىپ وتىراتىن. انىعىن ايتقاندا, انامىزدان جاسىراتىن قۇپيامىز بولعان جوق. ول كىسى ءبىزدىڭ ومىرمەن عۇمىر كەشتى, ال ءبىز ونىڭ ءومىرىنىڭ اجىراماس بولشەگى ەدىك. انالاردىڭ قادىرىن ءبىلىپ, ءاردايىم قۇرمەت كورسەتىپ, ارداقتاپ جۇرىڭىزدەر!» –دەدى پرەزيدەنت.

«توقاەۆ بەرىپ جىبەردى»: ماقپال ءجۇنىسوۆا اناسىنا ەرەكشە سىيلىق جاسادى

ەسكە سالايىق, بۇعان دەيىن قازاقستاندا مامىردىڭ ەكىنشى جەكسەنبىسىندە انالار كۇنى اتالىپ وتىلەتىنىن جازدىق. بۇل كۇن 2023 جىلعى ۇكىمەت قاۋلىسىنا سايكەس قىركۇيەكتەن مامىرعا اۋىستىرىلدى. مەرەكە وتباسىلىق قۇندىلىقتاردى نىعايتۋ جانە انالاردىڭ ەڭبەگىن قۇرمەتتەۋ ماقساتىندا بەلگىلەنگەن. سونىمەن قاتار اكەلەر كۇنى ماۋسىمنىڭ ءۇشىنشى جەكسەنبىسىندە تويلانادى.