Toqaev anasy jaıly esteliktermen bólisti

Foto: Tokayev_online

Prezıdent Qasym-Jomart Toqaev Analar kúnimen quttyqtap, anasy Turar Shabarbaevanyń ómiri men tárbıesi týraly estelikterin bólisti, dep jazdy qandastar.kz

«Búgin – Analar kúni! Osy oraıda anam Turar Shabarbaeva týraly az-kem estelikpen bóliskim keledi. Tórt balaly bizdiń otbasy qarapaıym turdy. Anam uzaq ýaqyt boıy belgili sebeptermen jumys istemedi, ol kisi úı jumysyn atqardy. Jalǵyz asyraýshymyz ákeı. Aılyq jalaqydan bólek, ol keı-keıde maqalalary men kitaptaryna qalamaqy alatyn. Mundaı kúnderi bizdiń úıde naǵyz mereke ornaıdy. Shesheı ol kezde jas áıel bola tura, kóp nárseden, onyń ishinde áshekeı zattar men qymbat kıimderden tartynatyn. Árıne, sándi kıinip, ásem áshekeıler taqqysy kelgeni tabıǵı ǵoı, alaıda bar ómirin perzentterine arnap, analyq paryzyn qysqa ǵumyrynyń aqyryna deıin atqaryp ótti. Tipti, qymbat dúnıeler alatyndaı múmkindik týǵan kezde de, ózine unaǵan zattardy nemerelerine áperýmen shekteletin», – dedi Toqaev.

Prezıdent anasynyń aqyl-parasaty men rýhanı tárbıesi ómirlik ustanymdaryna úlken áser etkenin jetkizdi.

«О́z ómirimniń Keńes Odaǵy taraýymen tuspa-tus kelgen syndarly sátinde anamnyń batyl qoldaǵany eshqashan umytylmaıdy. Sol bir qaýyrt kúnderi Máskeýde qalyp, Reseı memleketiniń Syrtqy ister mınıstrliginde qyzmet isteý nemese elge qaıtyp oralýdy anyqtaý qajet edi. Sonda anamnyń «Ákeń tiri bolsa, saǵan birden Qazaqstanda qyzmet etý kerek der edi» dep aıtqany esimde. Bul sóz buıryqtaı bolyp estildi. Sheshemiz, árıne, keıbir sheneýnikterdiń aıaqastynan qısapsyz baıyp shyǵa kelip jatqanyn bildi, biraq mundaı tirshiliktiń baıansyz jáne aqyry jaqsylyqqa aparmaıtynyn jalyqpaı aıtyp otyrdy», – dedi memleket basshysy.

Sonymen qatar prezıdent anasynyń qıyn sátterde batyl qoldaý bildirgenin jáne árdaıym ulynyń tazalyq pen ádildik jolynda bolýyn qalaǵanyn aıtty.

«О́zi de qarapaıym tirlik keshti, kózi jumylǵansha kóp nárseden ózin shektep otyrdy. Ylǵı da el aldynda uıatqa qalmaý úshin ózimdi taza ustaýdy, eshqashan kórseqyzarlyqqa barmaýdy aıtyp keńes beretin. Anam da únemi meni qoldaıtyn. Bala kúnimnen men onyń kóptegen maǵynasy tereń mazmundy áńgimelerin, oı-pikiri men paıymdaýlaryn tyńdap óstim ǵoı. Áńgimeni jaqsy aıtatyn jáne meniń de yqylastana tyńdaıtynymdy sezgen bolar, sóıtip ómirlik dúnıetanýyma ólsheýsiz yqpal etti. Jan-jaǵyma baıypty qarap, ustamdy bolýǵa, jaqsyny úırenýge jáne odan tek paıdalysyn alýǵa úıretti. «Kúni boıy jáne keshke nemen aınalysatynyńdy tańerteńnen oılaý kerek. Jınaqy júrý qajet, asyp-sasqan adam sátsizdikke ushyraıdy» dep jıi aıtatyn», – dedi Qasym-Jomart Toqaev.

Toqaev analardyń meıirimi men janashyrlyǵynyń ólsheýsiz ekenin eske salyp, barsha jurtty analaryn qurmetteýge shaqyrdy.

«Bizdiń anamyz usaq-túıek nársege deıin túgel bilýdi qajet sanady. Ol kisiniń qatysýynsyz ata-analar jınalysy ótken emes. Tórt balasynyń oqytýshylarynyń bárin biletin. Balalyq tentektigimizge, jetkinshektik qýanysh pen kúıinish-súıinishimizge qatysty jaılardy túp-túgel sezinip otyratyn. Anyǵyn aıtqanda, anamyzdan jasyratyn qupııamyz bolǵan joq. Ol kisi bizdiń ómirmen ǵumyr keshti, al biz onyń ómiriniń ajyramas bólshegi edik. Analardyń qadirin bilip, árdaıym qurmet kórsetip, ardaqtap júrińizder!» –dedi prezıdent.

«Toqaev berip jiberdi»: Maqpal Júnisova anasyna erekshe syılyq jasady

Eske salaıyq, buǵan deıin Qazaqstanda mamyrdyń ekinshi jeksenbisinde Analar kúni atalyp ótiletinin jazdyq. Bul kún 2023 jylǵy úkimet qaýlysyna sáıkes qyrkúıekten mamyrǵa aýystyryldy. Mereke otbasylyq qundylyqtardy nyǵaıtý jáne analardyń eńbegin qurmetteý maqsatynda belgilengen. Sonymen qatar Ákeler kúni maýsymnyń úshinshi jeksenbisinde toılanady.