«Eshkim tartyp ala almaıdy». Ilıa Ilın 12 jyl burynǵy Olımpıadany esine aldy

Foto: instagram.com/ilyailyinforever/

Osydan 12 jyl buryn Londondaǵy Olımpıadada jeńiske jetip, keıin dopıng qoldanǵany úshin chempıondyǵyn keri qaıtarǵan Ilıa Ilın ózin áli de bolsa chempıon sanaıtynyn jetkizdi, – dep habarlaıdy Massaget.kz tilshisi.

«12 jyl buryn jarqyn da myqty jeńis boldy. Ony menen eshkim tartyp almaıdy. Bul bizdiń jeńisimiz boldy. Meniń jeńisim boldy. Jaqyndarymnyń, týǵan-týystarymnyń jáne eńbegimdi baǵalaıtyndardyń barlyǵy úshin jeńis. Sharttar barlyǵyna birdeı boldy, men jeńiske jettim.
Bárimizdi jeńisimizben quttyqtaımyn, dostar. London 2012», – dep jazdy ol áleýmettik jelidegi paraqshasynda.

Ol bul jazbany 12 jyl buryn jeńis tuǵyryna kóterilgen kúni jarııalaǵan. Sportshyǵa dopıng qoldandy degen aıyp taǵylǵanymen, muny Ilıa Ilın áli kúnge deıin moıyndaǵan emes.