«ەسى دۇرىس ەمەس»: ەكى بالاسىن تۇنشىقتىرىپ ولتىرگەن ايەل جازادان قۇتىلدى

سوت شەشىمىنە سايكەس, ايەل قىلمىس جاساعان كەزدە ەسى دۇرىس ەمەس دەپ تانىلدى. وسىعان بايلانىستى ول قىلمىستىق جاۋاپكەرشىلىكتەن بوساتىلدى, دەپ حابارلايدى Qandastar.kz اقپارات پورتالى. 

اقتوبەدە 29 جاستاعى ايەل ءوز كامەلەتكە تولماعان بالالارى — ۇلى مەن قىزىن تۇنشىقتىرىپ ءولتىردى دەپ ايىپتالعان بولاتىن (قىلمىستىق كودەكستىڭ 99-بابىنىڭ 3-بولىگى — ەكى نەمەسە ودان دا كوپ ادامدى ءولتىرۋ).

«1996 جىلى تۋعان ايىپتالۋشى قىلمىستىق كودەكستىڭ 99-بابىنىڭ 3-بولىگى بويىنشا ايىپتالعان. ول قىلمىستىق كودەكستىڭ 519 جانە 522-باپتارىنا سايكەس قىلمىستىق جاۋاپكەرشىلىكتەن بوساتىلادى», — دەپ وقىدى ۇكىمدى سۋديا نۇرلان باقتىعاليەۆ.

قايعىلى وقيعا 2025 جىلدىڭ ناۋرىزىندا اقتوبە وبلىسىنىڭ قاندىاعاش قالاسىندا بولدى. جاس ايەل ءۇش جاسار ۇلىن جانە ون ءبىر ايلىق قىزىن جاستىقپەن تۇنشىقتىرىپ ولتىرگەن.

سوت پروتسەسى بارىسىندا سوت-پسيحياتريالىق ساراپتاما جۇرگىزىلدى. ماماندار ايىپتالۋشىعا سۋيتسيدتىك باعىتتاعى پارانويدتى شيزوفرەنيا دياگنوزىن قويدى. ساراپتاما قورىتىندىسى بويىنشا, ايەل پسيحيكالىق اۋىتقۋشىلىقتان زارداپ شەگەدى, بۇل ونىڭ ءوز ارەكەتتەرىنىڭ ناقتى ءمانىن جانە قوعامدىق قاۋىپتىلىگىن ءتۇسىنۋ قابىلەتىن جوققا شىعارادى.

سوت ايەلدى ارنايى مەديتسينالىق مەكەمەگە ماجبۇرلەپ ەمدەۋگە جىبەرۋ تۋرالى شەشىم قابىلدادى.