ESIL О́ZENI KО́TERILDi

Soltústik Qazaqstan oblysynda Esil ózeni kóterile bastady.

Ǵabıt Músirepov aýdanyna qarasty Toqsan Bı aýylynyń mańynda sýdyń deńgeıi 3 metrge jetken. «Bul muzdyń kóbesin sógip, seńniń júrýine yqpal etedi», — deıdi mamandar.

Sınoptıkterdiń boljamy boıynsha, bir aptadan keıin ózen arnasy Sergeev sý qoımasyn toltyryp, bóget ústimen aǵa bastaıdy. Qazir oblys boıynsha 19 gıdrobeket jumys isteıdi. Mamandar sýdyń deńgeıi men jyldamdyǵyn kúnine birneshe ret ólsheıdi.

Aıta keteıik, óńirde erteńnen bastap kún kúrt jylynyp, synap baǵanasy 15 gradýsqa deıin kóteriledi. Qymbat Merǵalymova, «Qazgıdromet» MKK SQOF dırektory: — Sergeev qoımasyndaǵy sýdyń bógetten asyp tógilýine 69 santımetr qaldy. Bul kóktemgi tasqynnyń belsendi kezeńi bastaldy degen sóz. Qazir Esil ózeniniń boıyndaǵy 30 eldi mekenge qaýip tónip tur.