«ەسىنەن تاندىراتىن زات بەرگەن»: جامبىل وبلىسىندا ايەل وقۋشى قىزىن جىگىتتەر توپتاسىپ زورلاپ كەتكەنىن مالىمدەدى

جامبىل وبلىسىنىڭ تۇرعىنى ايگۇل قونقاشوۆا 14 جاستاعى قىزىن جىگىتتەر توپتاسىپ زورلاعانىن مالىمدەدى,-دەپ حابارلايدى Qandastar.kz

سوزىنشە, سۇمدىق جاعدايدىڭ بولعانىنا ەكى اپتا وتسە دە, كۇدىكتىلەردىڭ ەشقايسىسى قامالماعان. وسىلايشا ءىس جىلى جابىلا ما دەپ قورقادى. ايتۋىنشا 8-سىنىپتاعى قىزعا ايۋاندىق جاساعاندار ەستەن تاندىراتىن بەلگىسىز زات بەرىپ, ونىمەن جىنىستىق قاتىناسقا تۇسكەن

ايەلدىڭ سوزىنشە, ءتۇن ورتاسىندا قىزىنىڭ توسەگىندە جوق ەكەنىن بايقاپ, شارق ۇرىپ ىزدەيدى. بىراق اقىرى بايلانىسا الماي, تاڭدى كوزبەن اتىرىپ كوشەگە شىققان. سول كەزدە اۋلاداعى ورىندىقتا قىزىنىڭ سۇلەسوق جاتقانىن اڭعارعان. قيمىلسىز قىزىن قۇشاقتاپ, اۋرۋحاناعا جەتكىزەدى. وقۋشىنى تەكسەرگەن ماماندار ساراپتاما تاعايىنداعان.

ايگۇل قونقاشەۆا سول ءتۇنى قىزىن تانىس جىگىتى ۇيدەن شىعۋعا كوندىرگەن دەپ وتىر. كەيىن كولىكتە تاعى ءۇش جىگىت بولعان دەيدى. ايتۋىنشا, جاس شامالارى 17, 18, 20, 25-تەگى جىگىتتەر 8-سىنىپ وقۋشىسىنا ويىنا كەلگەنىن ىستەپ, تاڭ سارىدە ەس-ءتۇسسىز كۇيدە ەسىك الدىنا اكەلىپ تاستاعان.

“قىزىم ەسىن بىلمەيدى. ماس ادامنىڭ بۋىن-بۋىنى ىستەمەيدى عوي, تۋرا سونداي. ىشىمدىكتەن بۇرىن, سينتەتيكالىق ەسىرتكىنىڭ بارى ءزار ارقىلى ساراپتامادان شىقتى. ناركولوگ, بارىنە اناليز وتكىزدىك سول كۇنى. بۇل جەردە توپتاسىپ زورلاۋ بولىپ تۇر عوي”, – دەدى قىزدىڭ اناسى ايگۇل قونقاشوۆا.

قىزدىڭ تۋىستارى كۇدىكتىلەردىڭ بوستاندىقتا جۇرگەنىن ايتادى. ال پوليتسيا تەك ساراپتامادان سوڭ عانا شەشىم قابىلدايمىز دەپ شىعارىپ سالعان.

“مەن سەندەردىڭ تەرگەۋشىلەرىڭە قاناعاتتانبايمىن, بالالار. بۇل نە دەگەن سۇمدىق?! كامەلەتكە تولماعان قىز وسىنداي جاعدايعا ءتۇسىپ جاتىر. وزدەرى الىپ كەتتى, زورلادى, اكەلىپ تاستادى. ەندى نەگە قامالمايدى دەگەنىمدە ماعان سول ەرجان “اپا, قامالعاندا سىزگە نە پايدا” دەپ ايتتى”, – دەدى قىزدىڭ اپاسى ايبارشىن شالوۆا.

ال بار وكپەسىن ايتقان جابىرلەنۋشىنىڭ تۋىستارى پروكۋراتۋرادان تەرگەۋشىلەردىڭ دورەكىلىگى, بالا قۇقىعىن قورعاۋ بويىنشا كوميسسيانىڭ كەلمەۋى, ءىستىڭ سوزباققا سالىنۋ سەبەبىن سۇرادى.

“سول كۇنى اۋداندىق پوليتسيا بولىمىندە قىلمىستىق كودەكستىڭ 122-بابى, ءبىرىنشى بولىمىمەن ىس قوزعالعان. قازىر سوت ساراپتامالارى تاعايىندالعان. جابىرلەنۋشى ايتىپ وتىرعان بارلىق سۇراق, ءۋاجى ەسكەرۋسىز قالمايدى. ونى مەن پروكۋرور رەتىندە نازارعا الامىن”, – دەدى قورداي اۋدانىنىڭ پروكۋرورى بىرلىك ءىزباساروۆ.

سوزباققا سالىنعان ساراپتاما قورىتىندىسى شىقپاي تۇرىپ قىزعا قانشا جىگىت وزبىرلىق جاساعانىن بىلە المايمىز. ال قىزدىڭ اناسى بۇل ءىستىڭ وگىز اياڭعا سالىنۋىنىڭ سىرى جىنىستىق قاتىناسقا ءتۇستى دەگەن جىگىتتەردىڭ سانىن ازايتۋ دەپ تۇسىنەدى.