«ەسىرتكى بەرىپ, جابىلىپ زورلاعان»: اقتاۋداعى جاس قىزدىڭ ولىمىنە قاتىستى تىڭ دەرەكتەر شىقتى

فوتو:

اقتاۋدا كوز جۇمعان الينا ەسىمدى قىزدىڭ ولىمىنە قاتىستى جاڭا مالىمەتتەردى انىقتالدى, دەپ جازادى qandastar.kz

پورتالدىڭ جازۋىنشا, ZTB NEWS ينستاگرام پاراقشاسىندا جاس قىزدىڭ ولىمىنە قاتىستى تىڭ دەرەكتەر جاريالانعان.

وقيعا قالاي بولعان?

بىلتىر مامىردا قىز وزىنە-ءوزى قول جۇمساعان. قايعىلى جاعدايعا دەيىن بىرنەشە كۇن بۇرىن ول اۋىر قىلمىستىڭ قۇربانى بولعان. مەفەدرون قولدانعان بەيتانىس ەر ادامدار وعان شابۋىل جاساپ, ۇرلاپ اكەتىپ, سوققىعا جىققان, كەيىن زورلاپ, ەكى ميلليون تەڭگەگە نەسيە راسىمدەۋگە ماجبۇرلەگەن.

مارقۇمنىڭ تۋىستارى نە دەيدى?

الينانىڭ اپكەسى باسىلىمعا ەكسكليۋزيۆ سۇحبات بەرىپ, وقيعانىڭ ءمان-جايىن جانە سوت شەشىمى نەلىكتەن ادىلەتسىز بولعانىن ايتتى.

الينا سپورتشى بولعان, فيتنەس جاتتىقتىرۋشىسى بولىپ جۇمىس ىستەگەن. ول ءوز جۇمىسىن جاقسى كورىپ, سپورتتىق شارالار مەن مارافوندارعا ءجيى قاتىسقان.

«14 مامىردا ول جۇمىستان كەيىن ۇيگە جالعىز قايتىپ كەلە جاتقان. سول ۋاقىتتا بەيتانىس بەس ەر ادام ونى بايقاپ, شابۋىل جاساپ, كۇشپەن كولىككە وتىرعىزعان. تەرگەۋ كەزىندە قىلمىسكەرلەر ونىڭ قىز ەكەنىن بىلمەگەنىن, جىگىت دەپ ويلاعانىن ايتىپ اقتالدى», – دەدى مارقۇمنىڭ اپكەسى.

ولار قىزدى ءتۇنى بويى ازاپتاپ, قورقىتقان, زورلىق-زومبىلىق كورسەتكەن, جانارماي بەكەتىندە كۇشپەن ۇستاپ وتىرعان. قىلمىسكەرلەردىڭ بارلىعى مەفەدرون قولدانعان. كەيىن ولار الينانى دا ەسىرتكى قابىلداۋعا ماجبۇرلەپ, زورلاعان.

قىلمىسكەرلەر كىمدەر?

كۇدىكتىلەردىڭ ءبىرى – 1991 جىلى تۋعان ەر ادام, ۇيلەنگەن, بالا تاربيەلەپ وتىر. تەرگەۋ كەزىندە ول العاش رەت مەفەدرون قولدانىپ كورگەنىن ايتىپ, ەشتەڭە ەسىندە جوق ەكەنىن العا تارتقان. ول كىناسىن مويىنداماعان. قالعان تورتەۋى قىلمىستىڭ بارلىق ەگجەي-تەگجەيىن ايتىپ بەرگەن.

تاڭ اتقان سوڭ قىلمىسكەرلەر قىزدى ءوزىنىڭ تەلەفونىنان ەكى ميلليون تەڭگە نەسيە راسىمدەۋگە ماجبۇرلەگەن. كەيىن بۇل اقشانى بازارداعى تانىستارى ارقىلى شەشىپ العان.

سودان سوڭ قىزدى قالاعا اكەلىپ, بىرەۋگە ايتسا, ولتىرەتىنىن ايتىپ قورقىتقان.

«وزىنە قول جۇمساماستان بۇرىن الينا ءبارىن قۇربىسىنا ايتىپ بەرگەن. قۇربىسى اعاسىنا ايتۋعا كوندىرەدى. الينا قىلمىسكەرلەردى جازالاۋ ءۇشىن سوڭىنا دەيىن باراتىنىن ايتقان. اعاسى بۇل تۋرالى اناسىنا ايتۋدى سۇراعان, بىراق الينا ۇيالعان», – دەدى مارقۇمنىڭ اپكەسى.

بۇل سۇمدىققا كونە الماعان قىز قۇربىسىنىڭ كوز الدىندا تەرەزەدەن سەكىرىپ كەتكەن.

«الينا ءوز جۇمىسىن جاقسى كورەتىن, ساياحاتتاۋدى ارماندايتىن. بوس ۋاقىتىندا كىتاپ وقىپ, فيلمدەر كورەتىن. ونىڭ مارافونداردان العان مەدالدارى كوپ», – دەدى اپكەسى.

ءىس سوتقا جەتكەن, بىراق مارقۇمنىڭ تۋىستارى قىلمىسكەرلەرگە قاتاڭ جازا تاعايىنداۋدى تالاپ ەتىپ وتىر.

ء«بىز باستى قىلمىسكەردى ءومىر بويىنا باس بوستاندىعىن ايىرۋدى, قالعان تورتەۋىنە 15-20 جىل جازا سۇرايمىز», – دەدى الينانىڭ اپكەسى.

سوت شەشىمى تۋرالى

سوت جابىق رەجيمدە وتكەن. مارقۇمنىڭ تۋىستارىنىڭ ايتۋىنشا, سوت پروتسەسىندە سۋديا ايىپتى قايتا قاراعان, سەبەبى قىز وزىنە-ءوزى قول جۇمساعان. قايتىس بولعان قىزدىڭ تۋىستارى اپەللياتسياعا بەرگەن. ولاردىڭ ايتۋىنشا, ءتورت قىلمىسكەر بىرنەشە جىلدان كەيىن شارتتى تۇردە مەرزىمىنەن بۇرىن بوساپ شىعۋى مۇمكىن.

ولار قىلمىسكەرلەردە ينتەرنەتكە كىرۋ مۇمكىندىگى بار ەكەنىن دە ايتىپ وتىر. الينانىڭ اپكەسىنىڭ سوزىنشە, ولار الەۋمەتتىك جەلىلەردە بەلسەندى, ءوز پاراقشالارىن جۇرگىزىپ وتىر.

«لادا» باسىلىمىنىڭ مالىمەتىنشە, ماڭعىستاۋ وبلىسىنىڭ پروكۋراتۋراسى قىزدىڭ ولىمىنە قاتىستى سوت ۇكىمىنە اپەللياتسيالىق ءوتىنىش بەرگەن. ۆەدومستۆو كىنالىلەرگە جازانى قاتاڭداتۋدى تالاپ ەتىپ وتىر.

ۆەدومستۆو مالىمەتىنشە, 2024 جىلعى جەلتوقساندا ماڭعىستاۋ وبلىسىنىڭ قىلمىستىق ىستەر جونىندەگى مامانداندىرىلعان اۋدانارالىق سوتى مارقۇمعا جاسالعان قىلمىستار جيىنتىعى بويىنشا باستى كۇدىكتىگە 20 جىل, ال ونىڭ ءتورت سىبايلاسىنا 7 جىلدان 8,5 جىلعا دەيىنگى جازا تاعايىنداعان.

پروكۋرور سوت جارىسسوزىندە باستى كۇدىكتىگە ءومىر بويى باس بوستاندىعىنان ايىرۋ, ال قالعاندارىنا 15-16 جىل جازا سۇراعان.

ەسكە سالايىق, بۇعان دەيىن اقتاۋدا بىرنەشە ەر ادام بويجەتكەندى ۇرلاپ اكەتىپ, مەفەدرون بەرىپ, قورلىق كورسەتكەنى حابارلاندى. جانتۇرشىگەرلىك جايت تۋرالى نەمولچي.kz قورى مالىمدەدى.