جاڭالىقتار
ەسىرتكى ساۋداسىمەن اينالىسقاندار ۇستالىپ, 1,1 ملرد تەڭگە تاركىلەندى
فوتو: پروكۋراتۋرا
وقيعا ورنىن تەكسەرۋ كەزىندە 1,174 ملرد تەڭگە مەن 176 مىڭ اقش دوللارى تاركىلەندى, دەپ جازدى qandastar.kz
قاڭتار ايىندا ماڭعىستاۋ وبلىسىنىڭ پروكۋراتۋراسى ەسىرتكى جانە پسيحوتروپتىق زاتتاردى وتكىزۋ فاكتىسى بويىنشا (قك-ءنىڭ 297-بابى, 3-بولىگى, 1-تارماق) سوتقا دەيىنگى تەرگەپ-تەكسەرۋدى باستادى. بۇل تۋرالى وبلىستىق پروكۋراتۋرا حابارلادى.قىلمىستىق ءىستى تەرگەۋ وبلىس پروكۋراتۋراسىنىڭ سوتقا دەيىنگى تەرگەپ-تەكسەرۋ باسقارماسىنا تاپسىرىلدى. وبلىس پروكۋرورى ايدوس مايلىباەۆتىڭ وكىمىمەن ۆەدومستۆوارالىق جەدەل-تەرگەۋ توبى قۇرىلدى. ونىڭ قۇرامىنا قارجىلىق مونيتورينگ اگەنتتىگىنىڭ جانە وبلىستىق پوليتسيا دەپارتامەنتىنىڭ قىزمەتكەرلەرى كىردى.
28 ناۋرىزدا تەرگەۋ بارىسىندا ەكى ەپيزودقا قاتىسى بار كۇدىكتىلەر ۇستالىپ, قپك-ءنىڭ 128-بابىنا سايكەس ۋاقىتشا ۇستاۋ يزولياتورىنا قامالدى. كەيىن سوت ولاردىڭ قاماۋدا ۇستاۋ تۋرالى شەشىم شىعاردى.
وقيعا ورنىن تەكسەرۋ كەزىندە 1,174 ملرد تەڭگە مەن 176 مىڭ اقش دوللارى تاركىلەندى.
قازىرگى ۋاقىتتا تەرگەۋ جالعاسۋدا. قپك-ءنىڭ 201-بابىنا سايكەس, سوتقا دەيىنگى تەرگەپ-تەكسەرۋ دەرەكتەرى جاريالانبايدى. تەرگەۋ بارىسى وبلىس پروكۋرورىنىڭ قاتاڭ باقىلاۋىندا.
