ەتكە قونعان شىبىننان دەرت تارادى

اقش-تا العاش رەت ادامنىڭ «ەت شىبىنى» (Cochliomyia hominivorax) دەرناسىلدەرىمەن زاقىمدانۋ جاعدايى تىركەلدى, دەپ حابارلايدى Qandastar.kz BAQ.KZ-كە سىلتەمە جاساپ.

اقپاراتتى ەلدىڭ دەنساۋلىق ساقتاۋ جانە الەۋمەتتىك قىزمەتتەر مينيسترلىگى مالىمدەگەن.

NBC News دەرەگىنشە, بۇل پارازيت – ەت شىبىنىنىڭ دەرناسىلدەرى – ءىرى قارا مالعا قاتتى زيان تيگىزۋى مۇمكىن جانە ءۇي جانۋارلارىن دا زاقىمدايدى. ول ورتالىق امەريكانىڭ كەيبىر ايماقتارىندا كەڭ تارالعان.

بۇل ۇساق پارازيتتىك شىبىنداردىڭ انالىقتارى كەز كەلگەن جىلى قاندى جانۋارعا جۇمىرتقا سالادى. جۇمىرتقالاردان شىققان جۇزدەگەن دەرناسىل يەسىن زاقىمدايدى.

اقش-تىڭ اۋرۋلاردى باقىلاۋ جانە الدىن الۋ ورتالىعى مەن مەريلەند شتاتىنىڭ دەنساۋلىق ساقتاۋ دەپارتامەنتى 4 تامىزدا سالۆادورعا بارعان تۇرعىننىڭ «ەت شىبىنىنان» دەرت جۇقتىرعانىن راستادى.

مەريلەند دەنساۋلىق ساقتاۋ دەپارتامەنتىنىڭ مالىمەتىنشە, ناۋقاس اۋرۋدان ايىعىپ شىققان.

زەرتتەۋ ناتيجەلەرى ينفەكتسيانىڭ باسقا ادامدارعا نەمەسە جانۋارلارعا تارالۋ بەلگىلەرىن كورسەتكەن جوق, – دەلىنگەن حابارلامادا.

اقش دەنساۋلىق ساقتاۋ مينيسترلىگىنىڭ وكىلى ەميلي گ. حيلليارد:

بۇل – ميازدىڭ (شىبىن دەرناسىلدەرىنىڭ پارازيتتىك زاقىمدانۋى) اقش-تا تىركەلگەن ءبىرىنشى جاعدايى. ول اۋرۋ وشاعى انىقتالعان ەلگە جاسالعان ساپاردان كەيىن پايدا بولدى, – دەدى.

1980–1990 جىلدارى ورتالىق امەريكادا بۇل دەرتتىڭ جاپپاي ءورشۋى ورىن العان ەدى. ونى جويۋ ءۇشىن وراسان قاراجات جۇمسالعانىمەن, سوڭعى ەكى جىلدا قايتا تىركەلىپ وتىر.

اقش پەن مەكسيكادا ءپارازيتتىڭ تارالۋىنا جول بەرمەۋ ءۇشىن ميللياردتاعان ستەريلدى شىبىن ءوسىرىلىپ, اۋەدەن تاستاۋ جوسپارلانعان. بۇل ءادىس كەزىندە ستەريلدى اتالىقتار انالىقتارمەن شاعىلىسىپ, جۇمىرتقادان دەرناسىل شىقپايدى. ناتيجەسىندە پوپۋلياتسيا ازايىپ, جويىلادى. بۇل ءتاسىل 1960 جىلدارى اقش-تا ەت شىبىنىنىڭ سوڭعى ءورشۋىن توقتاتۋدا ءتيىمدى بولعان.