Euronews اقتاۋداعى ۇشاق اپاتىنا رەسەيلىك زىمىران سەبەپ بولعانىن جازدى

فوتو: تجم

26 جەلتوقساندا ءازىربايجان ۇكىمەتىنىڭ دەرەككوزى Embraer E190AR ۇشاعىنىڭ اقتاۋدا قۇلاۋىنا رەسەيلىك «جەر-اۋە» زىمىرانى سەبەپ بولعانىن راستادى, دەپ حابارلايدى qandastar.kz اقپارات پورتالى Euronews باسىلىمىنا سىلتەمە جاساپ.

شەتەلدىك باسىلىم مالىمەتىنشە, زىمىران 8432 رەيسىنە قارسى اتىلعان, بۇل كەزدە گروزنىي ۇستىندە ۇشقىشسىز ۇشاتىن اپپاراتتار ارەكەت ەتكەن.

دەرەككوزدەر مالىمەتىنشە, «زىمىران گروزنىي ۇستىندە دروندارعا قارسى شارالار كەزىندە 8432 رەيسىنە باعىتتالعان, زىمىران ۇشاققا جاقىن جەردە جارىلىپ, ونىڭ سىنىقتارى جولاۋشىلار مەن ەكيپاج مۇشەلەرىنە تيگەن” دەلىنگەن حابارلامادا.

ءازىربايجان ۇكىمەتىندەگى دەرەككوزدىڭ Euronews-كە حابارلاۋىنشا, زاقىمدانعان ۇشاق ۇشقىشتاردىڭ شۇعىل قونۋ تۋرالى وتىنىشىنە قاراماستان, رەسەيدىڭ ەشبىر اۋەجايىنا قونۋعا رۇقسات ەتىلمەگەن. سونداي-اق ولارعا كاسپي تەڭىزى ارقىلى قازاقستاننىڭ اقتاۋ قالاسىنا قاراي ۇشۋعا بۇيرىق بەرىلگەن.

قولدا بار مالىمەتتەرگە سايكەس, ۇشاقتىڭ GPS ناۆيگاتسيالىق جۇيەلەرى تەڭىز ۇستىندە ۇشۋ بارىسىندا تولىقتاي بۇعاتتالعانى ايتىلادى.

مۇنداي تۇجىرىمدى بۇعان دەيىن دە الەمدىك مەديالار جازعان.