الەم جاڭالىقتارى
ەۋرووداق رەسەي اكتيۆتەرىنەن تۇسكەن كىرىس ەسەبىنەن ۋكرايناعا قورعانىس ءۇشىن 2 ميلليارد ەۋرو ءبولدى
فوتو: Lukasz Kobus/EU
12 مامىردا بريۋسسەلدە وتكەن “ۋكراينا قورعانىس” فورۋمىندا ەۋرووداق سىرتقى ساياسات قىزمەتىنىڭ باسشىسى كاي كاللاستىڭ وكىلى شارل فريز ەكى اپتادا ۋكرايناعا قارۋ-جاراق پەن وق-ءدارى الۋعا قوسىمشا 900 ميلليون ەۋرو بولىنەتىنىن مالىمدەدى, دەپ جازدى qandastar.kz
بۇل تۋرالى Stan.kz اقپارات اگەنتتىگى dw.com سىلتەمە جاساپ حابارلايدى.
بۇل سوما 9 مامىردا لۆوۆتا جاريالانعان 1 ميلليارد ەۋروعا قوسىمشا كومەك. قارجى ەو-دا بۇعاتتالعان رەسەيلىك اكتيۆتەردەن تۇسكەن پايىزدان بولىنۋدە. جالپى ەۋرووداق ۋكراينا قورعانىس ونەركاسىبىنە 3,3 ميلليارد ەۋرو باعىتتاپ, ەڭ ءىرى شەتەلدىك ينۆەستورعا اينالدى.
فورۋمدا ۋكراينا مەن ەۋروپانىڭ قورعانىس جانە اەروعارىش ونەركاسىبىنىڭ قاۋىمداستىعى (ASD) ىنتىماقتاستىق تۋرالى كەلىسىمگە قول قويدى. ASD ۋكراينامەن سەرىكتەستىكتى دامىتۋ ءۇشىن ارنايى ونلاين-پلاتفورمانى ىسكە قوستى.
ۋكراينا قورعانىس ءمينيسترى گەرمان سمەتانين ەۋروپا كومپانيالارىنىڭ ۋكراين قورعانىس سەكتورى مەن ونىڭ يكەمدىلىگىنە قىزىعۋشىلىعى ارتىپ كەلە جاتقانىن ايتتى. ەكى تاراپ ءوزارا ءتيىمدى سەرىكتەستىككە ۇمتىلىپ وتىر.
سول كۇنى ەۋرووداق پەن ۋكراينا قورعانىس ونەركاسىبىندەگى ىنتىماقتاستىقتى تەرەڭدەتۋ ءۇشىن بىرلەسكەن جۇمىس توبىن قۇردى. بۇل توپ ۋكراينا قورعانىس سالاسىن ەو وندىرىستىك جۇيەسىنە كىرگىزۋگە, سونداي-اق ReArm Europe باعدارلاماسىنا قاتىسۋعا كومەكتەسەدى. بۇل باعدارلاما گرانتتار مەن جەڭىلدەتىلگەن نەسيەلەردى قاراستىرادى.
فورۋم جابىق فورماتتا ءوتتى. بىراق قاتىسۋشىلار الەۋەتتى سەرىكتەستەرمەن كەزدەسىپ, سەمينارلارعا قاتىستى. ەۋروكوميسسار اندريۋس كۋبيليۋس ەو ستراتەگياسىندا ۋكراينا قورعانىسىن كۇشەيتۋ – باسىم باعىت ەكەنىن اتاپ ءوتتى.
