ەۋروپادا قازاقستاننىڭ اسكەري اتتاشەسى تىڭشىلىق جاسادى دەپ ايىپتالدى: ول تۋرالى نە بەلگىلى

فوتو: freepik.com

قورعانىس مينيسترلىگىنىڭ حالىقارالىق بايلانىستار ورتالىعى پولشا قۇقىق قورعاۋ ورگاندارىنىڭ قازاقستاننىڭ اسكەري اتتاشەسى اپپاراتىنىڭ قىزمەتكەرىن ۇستاعانىن راستادى, دەپ جازدى qandastar.kz

بۇل تۋرالى Stan.kz اقپارات اگەنتتىگى حابارلايدى.

ۆەدومستۆونىڭ مالىمەتىنشە, قازىر بۇل جاعدايدى شەشۋ ءۇشىن شەتەلدىك تاراپپەن بايلانىس ورناتىلعان. قازاقستان ازاماتىنىڭ قۇقىقتارى مەن زاڭدى مۇددەلەرىن قورعاۋ بويىنشا قاجەت شارالار قابىلدانىپ جاتىر.

پولشانىڭ ارنايى قىزمەتى قازاقستاننىڭ ۋكرايناداعى ەلشىلىگىندە جۇمىس ىستەگەن اسكەري اتتاشەنىڭ كومەكشىسىن (ەلشىلىككە نەمەسە ميسسياعا بەلگىلى ءبىر مامان رەتىندە جىبەرىلەتىن ادام) تىڭشىلىق جاسادى دەگەن كۇدىكپەن ۇستاعان. ABW (پولشا ارنايى قىزمەتى) دەرەگىنشە, ول اسكەري بارلاۋ وفيتسەرى بولىپ, پولشا مەن ونىڭ وداقتاستارىنا قارسى تىڭشىلىقپەن اينالىسقان.

ەر ادام 30 شىلدەدە بىدگوشش قالاسىندا قاماۋعا الىنىپ, سوت ونى ءۇش ايعا قاماۋ تۋرالى شەشىم شىعاردى. باق ونىڭ ەسىمىن انۋار ب دەپ اتادى. ول قازاقستاننىڭ ۋكرايناداعى ەلشىلىگىندە ءبىر جارىم جىل قىزمەت ەتكەن.

ديپلوماتيالىق يممۋنيتەتى ۋكراينا اۋماعىندا عانا كۇشىندە بولعاندىقتان, پولشا بيلىگى ونى كەدەرگىسىز ۇستاعان.

ەسكە سالايىق, بۇعان دەيىن لوندون سوتى قازاقستاننىڭ بەدەلىنە نۇقسان كەلتىرۋ ماقساتىندا جۇمىس ىستەگەن رەسەيلىك تىڭشىلارعا قاتىستى ءىستى قارادى. رەسەيلىك تىڭشىلار قازاقستان بيلىگىن سىناۋ ءۇشىن «بوراتتى» جالداماق بولعانىن جازعان ەدىك. سوتتا كۇدىكتىلەر القابيلەرگە رەسەيلىك قاۋىپسىزدىك قىزمەتتەرى قازاقستاندىق ارنايى قىزمەتتەرگە ۇيىمداستىرىلعالى جاتقان نارازىلىق اكتسيالارى تۋرالى جالعان اقپاراتتار بەرىپ, «ولاردىڭ ىقىلاسىنا يە بولعىسى» كەلگەندەرى تۋرالى مالىمدەمە جاسادى.