جاڭالىقتار
فەرروقورىتپا زاۋىتىندا زارداپ شەككەندەردىڭ ءبىرى قايتىس بولدى
فوتو: مۋحتور حولدوربەكوۆ/ Kazinform
قاراعاندىدا فەرروقورىتپا زاۋىتىندا توتەنشە جاعداي كەزىندە زارداپ شەككەن 31 جاستاعى قىزمەتكەر العان جاراقاتتاردىڭ سالدارىنان قايتىس بولدى, دەپ حابارلايدى كazinform اگەنتتىگىنىڭ ءتىلشىسى.
زارداپ شەككەندەردىڭ ءبىرى قايتىس بولعانى تۋرالى قايعىلى جاڭالىقتى قاراعاندى وبلىسىنىڭ دەنساۋلىق ساقتاۋ باسقارماسى مالىمدەدى.
«دارىگەرلەردىڭ سالعان بارلىق كۇش-جىگەرىنە قاراماستان, قاراعاندى فەرروقورىتپا زاۋىتىندا زارداپ شەككەن قىزمەتكەرلەردىڭ ءبىرىن ءولىم اۋزىنان اراشالاپ قالۋ مۇمكىن بولمادى. 1993 جىلى تۋعان ەر ادامنىڭ دەنەسىن 85% تەرەڭ كۇيىك شالعان. وسى ۋاقىتقا دەيىن بۇل ناۋقاس وتە اۋىر جاعدايدا بولىپ, بۇگىن قايتىس بولدى», – دەپ حابارلادى باسقارمادان.
قالعان بەس زارداپ شەككەن ادامنىڭ جاعدايى ءالى دە وتە اۋىر. ەكى ناۋقاس رەانيماتسيا بولىمىندە.
ەستەرىڭىزگە سالا كەتەيىك, 20 شىلدەدە قاراعاندىدا فەرروقورىتپا زاۋىتىنىڭ پەشىندە كەنەتتەن جالىن شىقتى. تج سالدارىنان كاسىپورىننىڭ سەگىز قىزمەتكەرى زارداپ شەكتى. ولار پروفەسسور ح. ج. ماقاجانوۆ اتىنداعى كوپسالالى اۋرۋحاناسىنا جاتقىزىلدى.
قر دەنساۋلىق ساقتاۋ مينيسترلىگىنىڭ تاپسىرماسى بويىنشا قوسىمشا مەديتسينالىق كومەك كورسەتۋ ءۇشىن قاراعاندىعا اكادەميك ن. د. باتپەنوۆ اتىنداعى ۇلتتىق تراۆماتولوگيا جانە ورتوپەديا عىلىمي ورتالىعىنىڭ ديرەكتورى ولجاس بەكارىسوۆ باستاعان قىزمەتكەرلەر توبى كەلدى.
