عالىمدار قاۋىپتى دەرتتى ەرتە انىقتايتىن تەست ويلاپ تاپتى

سامار ۋنيۆەرسيتەتىنىڭ عالىمدارى سوزىلمالى وكپە اۋرۋىن ء(سوا) قان تالداۋ ارقىلى انىقتايتىن جاڭا ءادىس ويلاپ تاپتى, دەپ حابارلايدى Qandastar.kz. بۇل ءتاسىل 90 پايىزدان استام دالدىكپەن جانە ءبىر ساعاتتان از ۋاقىتتا ناتيجە بەرەدى. Diagnostics جۋرنالىندا جاريالانعان دەرەكتەرگە سۇيەنسەك, ءسوا – الەم بويىنشا ءولىمنىڭ ءۇشىنشى سەبەبى.

ددسۇ مالىمەتىنشە, 2021 جىلى وسى اۋرۋدان 3,5 ميلليون ادام كوز جۇمعان. ءداستۇرلى ادىستەر, مىسالى, تىنىستى ولشەيتىن سپيرومەتريا, اۋرۋدى ەرتە ساتىسىندا ارقاشان انىقتاي المايدى.

جاڭا ءادىس قان قۇرامىنداعى وزگەرىستەردى لازەر ساۋلەسى ارقىلى زەرتتەپ, وكپە قابىنۋى مەن زاقىمدانۋىنىڭ «ىزدەرىن» تابادى.

«بۇل ساۋساق ءىزى ارقىلى قىلمىسكەردى تابۋعا ۇقسايدى, تەك ءبىز اۋرۋدىڭ حيميالىق ىزىنە قارايمىز. لازەر قاندى تەكسەرگەندە, وكپە اۋرۋىنا ءتان ەرەكشە وزگەرىستەردى كورۋگە بولادى», – دەيدى سامار ۋنيۆەرسيتەتىنىڭ دوتسەنتى ليۋدميلا براتچەنكو.

ونىڭ ايتۋىنشا, ءادىس رەسپيراتورلىق اۋرۋلاردى 92 پايىز دالدىكپەن, ال ءسوا مەن برونحيالدى استمانى 61 پايىز دالدىكپەن اجىراتادى.

سلنداي-اق عالىمداردىڭ ايتۋىنشا, ءادىستىڭ باستى ارتىقشىلىعى – جىلدامدىعى (30 مينۋت ىشىندە ناتيجە) جانە اۋىر پروتسەدۋرالاردىڭ قاجەت ەمەستىگى.

«بۇل مەديتسينالىق مەكەمەلەرگە تۇسەتىن جۇكتەمەنى ازايتىپ, دارىگەر جەتىسپەيتىن ايماقتاردا دياگنوزدى جىلدام قويۋعا مۇمكىندىك بەرەدى», – دەدى براتچەنكو.

قازىر زەرتتەۋ توبى ۇلگى سانىن كوبەيتىپ, قان ارقىلى اۋرۋدى ودان دا ناقتى انىقتاۋ جولدارىن جەتىلدىرۋدە. زەرتتەۋگە رەسەي مەن قىتايدىڭ مەديتسينالىق ۋنيۆەرسيتەتتەرى مەن زەرتتەۋ ينستيتۋتتارى قاتىسقان.