رۋدنىيلىق وقۋشى گارۆارد ۋنيۆەرسيتەتىنەن شاقىرتۋ الدى

رۋدنىي قالاسىنىڭ احمەت بايتۇرسىن ۇلى اتىنداعى جببم تۇلەگى اياجان جاديگەروۆا الەمدەگى ەڭ ۇزدىك جوعارعى وقۋ ورىندارىنىڭ بىرىنەن شاقىرتۋ الدى. بۇل جەتىستىككە جەتۋ ءۇشىن ول قاجىرلى ەڭبەك ەتىپ, تىلدىك سىناقتان جوعارى بالل جينادى.

رۋدنىيلىق وقۋشى اياجان جاديگەروۆا ەكى جىل بويى ۇزدىكسىز دايىندالدى. ول شەتەلدە ءبىلىم الۋعا بۇرىننان ارمانداپ كەلگەن. ارمان جاي عانا ءتاتتى قيال بولىپ قالماسىن دەپ وقۋشى قىز ءومىر داعدىسىن وزگەرتتى. الدىمەن استانا مەن الماتى قالاسىنداعى شەت تىلىنەن بىلىكتى ۇستازداردى ىزدەپ, ءتىلدى مەڭگەرۋگە اسىعادى. ۇزدىكسىز دايىندىقتىڭ ارقاسىندا SAT, IELTS, TOEFL تەستىن تاپسىرىپ, جوعارى ۇپاي جينادى. جاۋابى تەك ءساۋىر ايىندا بەلگىلى بولدى.

– دايىندالىپ جۇرگەنىمدى جاريا ەتپەدىم. ارينە, ۋايىم بولدى. تۋعان-تۋىستارىما تەك ناتيجەسىن كورسەتەمىن دەپ شەشتىم. جاۋابى كەلگەن ساتتە اتا-انامنىڭ جانە مەنىڭ قۋانىشىمدا شەك بولمادى. ول كىسىلەر ءۇشىن بۇل كۇتپەگەن جاڭالىق بولدى. تەستكە كەلەتىن بولساق, قيىنشىلىق بولدى دەپ ايتا المايمىن. وقۋ باعدارلاماسى باسقا بولسا دا, ەڭبەكتەنسەڭ — جاقسى ناتيجە كورسەتەسىڭ. باستىسى, ۋاقىتتى ءتيىمدى پايدالانۋ كەرەك. سونداي-اق, لوگيكالىق تۇرعىدان ويلانۋدى قاجەت ەتەدى. ودان بولەك – ءوزىن جايلى ىنتالاندىرۋ حاتىن تولتىرۋ جانە مىنەزدەمە جازدىرتۋ كەرەك. ول جەردە ءوزىمنىڭ ءومىرىم مەن قىزىعۋشىلىقتارىم جايلى بايانداپ بەرۋ كەرەك, – دەيدى تالاپكەر.

بۇگىندە اياجان اقش ەلىنە ۆيزا ازىرلەپ, دايىندىق ۇستىندە. ول ەلدە 4 جىل ءبىلىم الادى. جاس رۋدنىيلىق وقۋدى ءساتتى اياقتاعان سوڭ اتامەكەنىنە ورالىپ, مەديا-ماركەتينگ سالاسىنا ءوز ۇلەسىن قوسۋدى جوسپارلاپ وتىر.

اۆتور: ءسانيا ساقتاعان