«گارۆارد پەن وكسفوردقا دايىندايمىز دەدى»: الماتىدا جۇزدەگەن تالاپكەر الاياقتاردىڭ قۇربانى بولدى

الماتىدا گارۆارد پەن وكسفوردقا تۇسەمىز دەگەن ۇمىتپەن وقۋعا دايىندالعان جۇزدەگەن وقۋشى مەن ولاردىڭ اتا-انالارى الاياقتارعا الدانىپ قالدى. اتا-انالاردىڭ ايتۋىنشا, ءبىر جەكە ءبىلىم بەرۋ ورتالىعى بالالارىڭىزدى الەمنىڭ جەتەكشى ۋنيۆەرسيتەتتەرىنە دايىندايمىز دەپ ۋادە بەرىپ, ءار وقۋدان 1,5 ميلليون تەڭگە كولەمىندە اقى العان. الايدا كۇتپەگەن جەردەن وقۋ ورتالىعى جابىلىپ, كەڭسەلەردىڭ ەسىكتەرى مورلەنگەن. قازىر ورتالىقتىڭ باسشىلارى بايلانىسقا شىقپاي وتىر. بۇل تۋرالى  Qandastar.kz اقپاراتتىق پورتالى كتك تەلەارناسىنا سىلتەمە جاساپ حابارلايدى.

قازىر وقۋ ورتالىعىنىڭ كەڭسەسىنىڭ الدىندا اتا-انالار مەكەمە باسشىلارىمەن كەزدەسۋدى تالاپ ەتىپ جاتىر. كوپبالالى انا ماريام كوستريگينانىڭ ايتۋىنشا, ولاردى اكتسيا ارقىلى قاتىسىپ جاتىر دەپ الداعان.

«بىزگە «جولىمىز بولدى, اكتسياعا تۇستىڭىزدەر» دەدى. توعىز ايلىق وقۋ 600 مىڭ تەڭگە بولادى دەدى. ءبىز سول سومانى تولەدىك. كۇيەۋىممەن بىرگە نەسيە الىپ, اقشانى بەردىك. مامىر ايىنان باستاپ ساباق مۇلدە توقتادى. اقشانى قايتارىپ بەرۋدى سۇراعانىمىزدا, ەش جاۋاپ المادىق», –دەدى ماريام كوستريگينا.

كوپ اتا-انا بالالارىن IELTS جانە ماتەماتيكا ساباقتارىنا جازدىرعان. ءتىپتى كەيبىر اتا-انالار قوسىمشا شەت ءتىلىن (نەمىس, تۇرىك نەمەسە يتاليان ءتىلىن) تەگىن ۇيرەنۋگە بولادى دەگەن ۋادەنى ەستىگەن.

اتا-انا دميتري ۆەريگونىڭ سوزىنشە, بالالارىنا بىرنەشە ءتىلدى تەگىن ۇيرەنۋگە بولادى دەپ سەندىرگەن.

«بىزگە اپتاسىنا بەس رەت IELTS پەن ماتەماتيكا وتەدى دەدى. قوسىمشا ءبىر شەت ءتىلىن تەگىن ۇيرەتەمىز دەدى. بىراق ول ساباقتارعا ءبىز ءتىپتى قاتىسا دا المادىق. قىزىمىز شوك جاعدايىندا. ءبىز قانداي دا ءبىر جول ىزدەپ جاتىرمىز. بىراق بۇل اقشانى قايتارامىز دەپ ۇمىتتەنە المايمىز», – دەدى دميتري ۆەريگو.

يمانعاليەۆتەر وتباسى دا الدانىپ قالعان. ولار ۇلدارىن ۆەنگريا ۋنيۆەرسيتەتىنە دايىنداۋ ءۇشىن 1,4 ميلليون تەڭگە تولەگەن. ۇلى سپورتتى تاستاپ, بار ۋاقىتىن وقۋعا ارناعان.

« ۇلىم – ۆەلوسپورتتان سپورت شەبەرلىگىنە كانديدات. ونى سپورتتان شىعارىپ, وقۋعا كوندىردىك. «كۇنىنە بەس رەت ساباق بولادى» دەدى. بىراق ءبىر ايدان سوڭ ۆەنگريا ۋنيۆەرسيتەتتەرىنە 18 جاستان كەيىن عانا قابىلدايتىنىن بىلدىك. ۇلىم 11-سىنىپتا, جاسى 17-دە. قازىر ول سپورتسىز دا, ءبىلىمسىز دە قالدى», – دەدى ماقپال مۇحتارقىزى.

استانادا دا وسىنداي جاعداي قايتالانىپ وتىر. وندا دا كوپتەگەن اتا-انا بالاسىن وقۋعا دايىندايمىز دەگەن ورتالىققا اقشا تولەپ, دىمسىز قالعان. الماتى مەن استانادا زارداپ شەككەندەر سانى مىڭنان اسقان. ءتىپتى كەيبىر مۇعالىمدەرگە دە جالاقى تولەنبەگەن.

ءبىلىم ورتالىعىنىڭ بىرنەشە فيليالى بولعان. الماتىداعى ەكى مەكەمەنىڭ دە ەسىگى مورلەنگەن. ورتالىقتىڭ باسشىلارى قايدا ەكەنى بەلگىسىز.

«مۇنداي جەكە قوسىمشا ءبىلىم بەرۋ ورتالىقتارىنا باقىلاۋ بولعان ەمەس. بىراق قاجەت بولسا, بۇل ماسەلەنى دەپۋتاتتارمەن بىرگە كوتەرەمىز. زاڭ جۇزىندە قاراستىرۋ كەرەك. اتا-انالار سوتقا نەمەسە قۇقىق قورعاۋ ورگاندارىنا جۇگىنە الادى», – دەدى وقۋ-اعارتۋ ءمينيسترى عاني بەيسەمباەۆ.

الماتى قالاسى پوليتسيا دەپارتامەنتىنىڭ رەسمي وكىلى سالتانات ازىربەكتىڭ ايتۋىنشا, الدانعان اتا-انالار ارىز جازعان.

«بارلىق ارىز ءبىر وندىرىسكە بىرىكتىرىلدى. اباي اۋدانى پوليتسيا باسقارماسىنىڭ تەرگەۋ ءبولىمى قىلمىستىق كودەكستىڭ 190-بابى بويىنشا (اسا ءىرى كولەمدەگى الاياقتىق) قىلمىستىق ءىس قوزعادى. قازىر تەرگەۋ امالدارى ءجۇرىپ جاتىر. قىلمىسقا كىنالى ادامدارعا قاتىستى ءتيىستى شارالار قابىلدانادى», – دەدى سالتانات ازىربەك.

وقۋ ورتالىعىنىڭ باسشىلارىنىڭ قايدا ەكەنى ازىرگە بەلگىسىز. اتا-انالار بۇل ءىستى سوتقا جەتكىزبەك.