گاۋحار تاناشەۆا نەگە دەپۋتاتتىق مانداتسىز قالدى?

فوتو:Parlam.kz

قازاقستان حالىق پارتياسىنىڭ اتىنان ماجىلىسكە سايلانعان دەپۋتات گاۋھار تاناشەۆا 14 قاڭتار كۇنى دەپۋتاتتىق وكىلەتتىگىنەن ايىرىلعانى تۋرالى qandastar.kz جازدى.

سونىمەن, ەكس دەپۋتات كىم, قانداي باستامالارىمەن ەل ەسىندە قالدى?

Massaget.kz سايتىنىڭ جازۋىنشا, گاۋھار شايمەردەنقىزى 11 بالانىڭ اناسى. كوپبالالى انا ەلدەگى دەموگرافيالىق ماسەلەلەرگە ءجيى دەن قويىپ, بىلتىر ماۋسىمدا قازاقستاندىق بالالارعا 70 مىڭ تەڭگە الەۋمەتتىك تولەم تولەۋدى ۇسىنعان ەدى.

«نەگە قازاقستاندا بالا تۋدى ىنتالاندىرماسقا? بۇل بولاشاقتا كوپبالالى وتباسى بولا الاتىن جاستارعا باعىتتالۋى كەرەك. بالا سانىنا قاراماستان, كوپبالالى وتباسى ما, كوپبالالى وتباسى ەمەس پە, وتباسىنداعى ءبىر بالاعا – 70 مىڭ بەرىلۋى كەرەك. ءبىر بالاڭىز بولسا دا, سىزگە 70 مىڭ تەڭگە بەرىلسىن. ويتكەنى ءسىز وسى وتانعا قىزمەت ەتەتىن, ونى قورعايتىن, وسىندا جۇمىس ىستەيتىن, سالىق تولەيتىن, ەلىمىزدى دامىتاتىن قازاقستان ازاماتىن دۇنيەگە اكەلدىڭىز. سوندىقتان ءبىز ءاربىر ادامدى باعالاي ءبىلۋىمىز كەرەك», – دەگەن بولاتىن ول.

الايدا سول كەزدە دەپۋتاتتىڭ ساۋالىنا «شىعىنى كوپ نورما» دەگەن جاۋاپ بەرىلىپ, اياقسىز قالدى.

2023 جىلى گاۋھار تاناشەۆا «وتباسىلىق كاپيتال» باعدارلاماسىن ىسكە اسىرۋ تۋرالى باستاما كوتەرگەن ەدى. دەپۋتات ەلىمىزدە 550 مىڭ كوپبالالى جانە ەرەكشە بالالاردى تاربيەلەپ وتىرعان 107 مىڭ وتباسى بارىن العا تارتىپ, ءتورتىنشى بالاسى دۇنيەگە كەلگەن وتباسىلارعا 2 ملن 300 مىڭ تەڭگە بەرۋ (بىرجولعى تولەم) تۋرالى ۇسىنىس ايتقان بولاتىن.

«دەموگرافيانى كوتەرىپ جاتقان كوپبالالى وتباسىلاردىڭ ءبىرازى كەدەيشىلىكتە ءومىر ءسۇرىپ جاتىر. قازاقستان تاۋەلسىزدىك العاننان بەرى حالىق سانى 20 ميلليونعا, ياعني 32 جىل ىشىندە 4 ملن ادامعا عانا كوبەيدى. قازاقستان حالىق پارتياسى فراكتسياسىنىڭ دەپۋتاتتارى وتباسىندا ءتورتىنشى بالا دۇنيەگە كەلگەندە نەمەسە وتباسىدا ەرەكشە بالا بولسا 5 000 دوللار (2 ملن 300 مىڭ تەڭگە) مولشەرىندە «وتباسىلىق كاپيتال» باعدارلاماسىن ىسكە قوسۋدى ۇسىنادى», – دەگەن ەدى ول.

گاۋھار تاناشەۆا 2023 جىلى الماتى, شىمكەنت, قوناەۆ, تالعار قالالارىنا بارىپ, جامبىل, تۇركىستان, جەتىسۋ وبلىستارىن ارالاپ شىققان. اتالمىش ايماقتارداعى اۋدان-اۋىلداردى ارالاپ, حالىقپەن تىلدەسىپ, بىرنەشە ماسەلەلەردى ءتىزىپ شىققان ەدى.

دەپۋتات وڭىرلەردەگى مەكتەپتەر مەن اۋرۋحانالارعا كۇردەلى جوندەۋ قاجەت دەگەندى العا تارتىپ, شارۋالارعا جايىلىمدىق جەر جەتىسپەيتىنىن جاريالادى. بۇعان قوسا كوپبالالى جانە الەۋمەتتىك قورعالماعان وتباسىلار اتاۋلى الەۋمەتتىك كومەككە قول جەتكىزە الماي جۇرگەنىن مالىمدەدى. سونىمەن قاتار مەديتسينا سالاسى قىزمەتكەرلەرىنىڭ جالاقىسىنىڭ ماردىمسىزدىعىنا نازار اۋداردى.

«ۇكىمەت جۇمىسىن جوسپارلى ءھام جۇيەلى ۇيىمداستىرسا, قازىرگىدەي كەمشىلىكتەر بولماس ەدى. وكىنىشكە قاراي, بىزدە بۇلاي ەمەس. سىبايلاس جەمقورلىقتىڭ سالدارىنان حالىققا اقشا جەتپەيدى. اتقارۋشى بيلىك مىندەتىن ءمىنسىز اتقارسا, كوپتەگەن ماسەلەلەر وزدىگىنەن شەشىلەتىن ەدى», – دەگەن ەدى ول ساپار بارىسىندا.

بۇدان بولەك, وسى ساپارى بارىسىندا جەتىسۋ وبلىسى شىمىر اۋىلىنىڭ م.مامەتوۆا اتىنداعى ورتا مەكتەبىنىڭ كۇردەلى جوندەۋدەن وتپەگەنىن جانە جەرگىلىكتى اتقارۋشى ورگاندار جوندەۋ جۇمىسىنا اقشا تاپپاي وتىرعانىن جاريالاعان ەدى.

دەپۋتاتتىق قىزمەتىنەن كەتپەس بۇرىن گاۋھار تاناشەۆا جەلتوقساننىڭ 25-ءى كۇنى ءماجىلىس وتىرىسىندا وتكىر پىكىر ايتىپ, سوڭعى ساۋالىن جولداعان ەدى.

«بيلىگى حالقىن اياماعان ەلدە ىلگەرىلەۋ مۇمكىن ەمەس. جۇرت بالاسىن قالاي اسىرارىن, قارىزىن قالاي وتەرىن بىلمەي, ەرتەڭگى كۇننەن قورقىپ ءومىر سۇرەدى. حالىقتىڭ 80 پايىزدان استامى قارىزبەن ءومىر سۇرەدى. مۇنداي جاعدايدا پاتريوتيزم مەن دامۋ تۋرالى ايتۋ قيىن», – دەگەن ەدى ول.

گاۋھار تاناشەۆا – 1974 جىلى 29 قاراشادا دۇنيەگە كەلگەن. 1992-1998 جج. – س.ج.اسفەندياروۆ اتىنداعى قازاق مەملەكەتتىك مەديتسينا ۋنيۆەرسيتەتىن تامامداعان. سودان كەيىن 1998-2000 جج. – س.ج. اسفەندياروۆ اتىنداعى قازاق مەملەكەتتىك مەديتسينا ۋنيۆەرسيتەتىن كارديولوگيا فاكۋلتەتىن وقىپ بىتىرگەن. 2002-2007 جج. – حالىقارالىق ماماندىقتار ينستيتۋتىن «ەكونوميكا» ماماندىعىمەن وقىپ شىقتى. كەيىن 2008 ج. – «كارديولوگيا جانە ىشكى اۋرۋلار عىلىمي-زەرتتەۋ ينستيتۋتى», كارديولوگيا ماماندىعى بويىنشا بىلىكتىلىگىن ارتتىرعان.

ەڭبەك ءوتىلى (قىزمەتى):

2000-2002 جج. – س.ج. اسفەندياروۆ اتىنداعى قازۇمۋ, ينتەرندەرگە ارنالعان ىشكى اۋرۋلار كافەدراسىنىڭ اسسيستەنتى;

2003-2016 جج. – ءىرى فارماتسەۆتيكالىق كومپانيالاردىڭ ماركەتينگ ءبولىمى (Pfizer, Gedeon Richter, Zentiva, Sanofi, Actavis)

2014-2022 جج. – «قازاقستان بالالارى «جاستاردى دامىتۋ الماتى قايىرىمدىلىق قورى» قوعامدىق قورىنىڭ پرەزيدەنتى

2020-2023 جج. – «قازاقستان انالارىنىڭ بىرلەستىگى» كورپوراتيۆتىك قورىنىڭ ديرەكتورى.

2023 جىلدىڭ 28 ناۋرىزىنان بۇگىنگى كۇنگە دەيىن «قازاقستان حالىق پارتياسىنىڭ» پارتيالىق ءتىزىمى بويىنشا قازاقستان رەسپۋبليكاسى پارلامەنتى ءماجىلىسىنىڭ VIII شاقىرىلىم دەپۋتاتى, قازاقستان رەسپۋبليكاسى پارلامەنتى ءماجىلىسىنىڭ الەۋمەتتىك-مادەني دامۋ كوميتەتىنىڭ مۇشەسى, قازاقستان رەسپۋبليكاسى پارلامەنتى ءماجىلىسىنىڭ «قازاقستان حالىق پارتياسىنىڭ» فراكتسياسىنىڭ مۇشەسى بولدى.