گازادا تاعى بەس جۋرناليست قازا تاپتى

ءيزرايلدىڭ گازا سەكتورىنداعى ناسەر اۋرۋحاناسىنىڭ ماڭىنا جاساعان اۋە سوققىسى سالدارىنان 20 ادام قازا تاپتى. ولاردىڭ اراسىندا حالىقارالىق باق-تا قىزمەت ەتكەن 5 جۋرناليست بار, دەپ حابارلايدى Qandastar.kz

اگەنتتىكتىڭ مالىمەتىنشە, قازا بولعانداردىڭ قاتارىندا Reuters اگەنتتىگىنىڭ وپەراتورى حۋسام ءال-ماسري, Associated Press-ءتىڭ ءجۋرناليسى ماريام داگگا, سونداي-اق Al Jazeera-دا جۇمىس ىستەگەن مۋحاممەد سالامە, فوتوگراف مۋاتح ابۋ تاحا جانە احماد ابۋ ازيز بار.

Al Jazeera, Reuters جانە Associated Press اگەنتتىكتەرى قىزمەتكەرلەرىنىڭ ولىمىنە بايلانىستى قارالى كۇيدە ەكەنىن ءبىلدىردى.

يزرايل اسكەرى (تساحال) ناسەر اۋرۋحاناسىنىڭ ماڭىنا سوققى جاساعانىن راستادى.

«تساحال جۋرناليستەردى نىساناعا المايدى جانە بەيبىت تۇرعىندارعا كەلەتىن زالالدى بارىنشا ازايتۋعا تىرىسادى. اسكەريلەردىڭ قاۋىپسىزدىگىن قامتاماسىز ەتۋ ءۇشىن وسىنداي شارالار قابىلداندى», – دەپ مالىمدەمە جاسادى يزرايل وكىلدەرى.