جاڭالىقتار
«گازەلدى باسىپ وزباق بولعان»: قوستاناي وبلىسىندا جول اپاتىنان ءتورت ادام كوز جۇمدى
فوتو: قوستاناي وبلىسى پد
قوستاناي وبلىسىندا ءتورت ادامنىڭ ءومىرىن قيعان جول-كولىك وقيعاسى بويىنشا قىلمىستىق ءىس قوزعالدى. بۇل تۋرالى وبلىستىق پوليتسيا دەپارتامەنتىنىڭ ءباسپاسوز قىزمەتى مالىمدەدى, دەپ حابارلايدى qandastar.kz
16 قىركۇيەك كۇنى كەشكى ۋاقىتتا جانگەلدين اۋدانى تورعاي اۋىلىنىڭ ماڭىندا «تورعاي-ارقالىق» اۆتوجولىنىڭ 17-ءشى شاقىرىمىندا Lexus پەن گازەل كولىكتەرى سوقتىعىسقان جول اپاتى بولدى. ەكى كولىك تە ارقالىق قالاسىنا قاراي ءبىر باعىتتا ءجۇرىپ كەلە جاتقان.
الدىن الا مالىمەتتەر بويىنشا, Lexus كولىگىنىڭ 38 جاستاعى جۇرگىزۋشىسى باسىپ وزۋ كەزىندە كولىكتى باسقارا الماي, ەكىنشى كولىكپەن سوقتىعىسقان.
«جول-كولىك وقيعاسى سالدارىنان Lexus كولىگىنىڭ جۇرگىزۋشىسى مەن ەكى جولاۋشىسى, ونىڭ ىشىندە ەكى بالا وقيعا ورنىندا العان جاراقاتتارىنان كوز جۇمدى. تاعى ءبىر جولاۋشى اۋرۋحانادا قايتىس بولدى. وسى وقيعا بويىنشا پوليتسيا قىلمىستىق ءىس قوزعادى. وقيعا ورنىندا جەدەل-تەرگەۋ توبى جۇمىس ىستەپ جاتىر», – دەلىنگەن حابارلامادا.
پوليتسيا قىزمەتكەرلەرى جۇرگىزۋشىلەردى جول قوزعالىسى ەرەجەلەرىن, اسىرەسە, جىلدامدىق رەجيمىن جانە مانەۆر جاساۋ قاعيدالارىن قاتاڭ ساقتاۋعا شاقىرادى.
