گەماتوما مەن دەنەسى كوگەرگەن: گەرمانيادا جوعالىپ كەتكەن ايەلدىڭ اعاسى جاعداي تۋرالى ايتتى

ايگۇل سايلىباەۆانىڭ اعاسى قارىنداسى ولارعا زورلىق-زومبىلىق فاكتىلەرى تۋرالى ايتپاسا دا, دوستارى بۇل تۋرالى بولجاعانىن ءتۇسىندىردى,-دەپ حابارلايدى Qandastar.kz

“قارىنداسىم جوعالىپ كەتكەننەن كەيىن مەن ونىڭ قۇربىلارىمەن تىلدەسىپ, قارىنداسىمنىڭ قالاي قينالعانىن, كۇيەۋى وعان تۇرلى فيزيكالىق جانە پسيحولوگيالىق قىسىم كورسەتكەنىن ەستىدىم.

كۇيەۋىنىڭ تۋىستارى, اسىرەسە ەنەسى كۇن بەرمەگەن كورىنەدى. گەماتومالارى, سوققى الىپ, دەنەسى كوگەرگەن, سىرىلعان, قۇلاقتارى ىسىنگەن فوتولارى بار. كەيىنگى ايدا ول ۆيدەوقوڭىراۋعا شىقپادى”, – دەدى ايگۇل سايلىباەۆانىڭ اعاسى قانات سايلىباەۆ.

ايگۇل سايلىباەۆا 2020 جىلى كۇيەۋىمەن بىرگە قازاقستاننان كەتكەن. ولار ءارتۇرلى ەلدەردە تۇرعان, سوڭعىسى – گەرمانيانىڭ بەنسحايم قالاسى. ايەلدىڭ كۇيەۋى قۇقىق قورعاۋ ورگاندارىنا ولاردىڭ ناقتى تۇرعىلىقتى مەكەنجايىن ايتقىسى كەلمەگەن ەكەن. وسىعان بايلانىستى جوعالعانىن ءۇش كۇن بولعاننان كەيىن عانا پاتەردى تىنتىگەن.

ايگۇل سايلىباەۆا تۋىستارىنا سوڭعى رەت 3 ماۋسىمدا حابارلاسقان. بىراق قازاقستاندىق ديپلوماتتار ايەلدىڭ جوعالعانىن 5 ماۋسىمدا ونىڭ تۋىستارى باس كونسۋلدىققا حابارلاسقاندا عانا ءبىلدى.

“جەرگىلىكتى پوليتسيا قىزمەتكەرلەرىمەن اڭگىمەلەسىپ, ولار مۇقيات ىزدەيتىندەرىن ايتتى.

سوعان قاراماستان بەرليندەگى باس كونسۋلدىعىمىز بەن ەلشىلىگىمىز بۇل ماسەلەنى ەرەكشە باقىلاۋدا ۇستاۋ ءۇشىن گەرمانيانىڭ سىرتقى ىستەر مينيسترلىگىنە ءتيىستى ۇندەۋ جولدادى. قازىر نەمىس تاراپىمەن بىرلەسە وتىرىپ, قازاقستانداعى تۋىستارىنا ۆيزا الۋ ماسەلەسىن پىسىقتاپ جاتىرمىز”, – دەپ مالىمدەدى سىرتقى ىستەر مينيسترلىگىنىڭ رەسمي وكىلى ايبەك سمادياروۆ.