Gematoma men denesi kógergen: Germanııada joǵalyp ketken áıeldiń aǵasy jaǵdaı týraly aıtty

Aıgúl Saılybaevanyń aǵasy qaryndasy olarǵa zorlyq-zombylyq faktileri týraly aıtpasa da, dostary bul týraly boljaǵanyn túsindirdi,-dep habarlaıdy Qandastar.kz

“Qaryndasym joǵalyp ketkennen keıin men onyń qurbylarymen tildesip, qaryndasymnyń qalaı qınalǵanyn, kúıeýi oǵan túrli fızıkalyq jáne psıhologııalyq qysym kórsetkenin estidim.

Kúıeýiniń týystary, ásirese enesi kún bermegen kórinedi. Gematomalary, soqqy alyp, denesi kógergen, syrylǵan, qulaqtary isingen fotolary bar. Keıingi aıda ol vıdeoqońyraýǵa shyqpady”, – dedi Aıgúl Saılybaevanyń aǵasy Qanat Saılybaev.

Aıgúl Saılybaeva 2020 jyly kúıeýimen birge Qazaqstannan ketken. Olar ártúrli elderde turǵan, sońǵysy – Germanııanyń Benshaım qalasy. Áıeldiń kúıeýi quqyq qorǵaý organdaryna olardyń naqty turǵylyqty mekenjaıyn aıtqysy kelmegen eken. Osyǵan baılanysty joǵalǵanyn úsh kún bolǵannan keıin ǵana páterdi tintigen.

Aıgúl Saılybaeva týystaryna sońǵy ret 3 maýsymda habarlasqan. Biraq qazaqstandyq dıplomattar áıeldiń joǵalǵanyn 5 maýsymda onyń týystary bas konsýldyqqa habarlasqanda ǵana bildi.

“Jergilikti polıııa qyzmetkerlerimen áńgimelesip, olar muqııat izdeıtinderin aıtty.

Soǵan qaramastan Berlındegi bas konsýldyǵymyz ben elshiligimiz bul máseleni erekshe baqylaýda ustaý úshin Germanııanyń syrtqy ister mınıstrligine tıisti úndeý joldady. Qazir nemis tarapymen birlese otyryp, Qazaqstandaǵy týystaryna vıza alý máselesin pysyqtap jatyrmyz”, – dep málimdedi syrtqy ister mınıstrliginiń resmı ókili Aıbek Smadııarov.