گەنەرال-مايور «زاكاز ىستەر» قانداي جاعدايدا توقتايتىنىن ايتتى

فوتو: ۆيدەودان كادر

قر قورعانىس مينيسترلىگى كادر دەپارتامەنتىنىڭ ەكس-باسشىسى, گەنەرال-مايور قايرات كوپباەۆ Adal Adam Youtube ارناسىنا بەرگەن سۇحباتىندا «زاكاز» ىستەر قانداي جاعدايدا توقتايتىنىن ايتتى, – دەپ حابارلايدى qandastar.kz

«لوگيكالىق تۇرعىدان قاراساق تا, اقتالىپ شىققان ازاماتتارعا زاڭسىز ۇكىم كەسكەن, ولاردى زاڭسىز قۋدالاپ, تەرگەگەن, اباقتىدا زاڭسىز ۇستاعان تەرگەۋشىلەر, پروكۋرورلارعا, سۋديالارعا جازا قولدانۋى كەرەك. بىراق ولاردىڭ قىلمىستىق جاۋاپكەرشىلىككە تارتىلعانىن ەستىمەپپىن. بالكىم, تارتىپتىك شارا بەرىلگەن شىعار. ول دا بەلگىسىز.

ەگەر زاڭسىز ۇكىم شىعارعانى, زاڭسىز ءىس قوزعاعانى ءۇشىن سۋديا, تەرگەۋشىلەر سوتتى بولىپ جاتسا, «زاكاز ىستەر» ازايىپ, قۇردىمعا كەتەر ەدى. كەيىنگى ءۇش جىلدا پروكۋروردىڭ پروتەستىمەن 4 اسكەري اقتالدى, بىراق سولاردىڭ ءىسىن جۇرگىزگەن تەرگەۋشى, ۇكىم كەسكەن سۋديا سوتتالدى دەگەندى ەستىگەن جوقپىن», – دەدى ول.