General-maıor «zakaz ister» qandaı jaǵdaıda toqtaıtynyn aıtty

Foto: vıdeodan kadr

QR Qorǵanys mınıstrligi kadr departamentiniń eks-basshysy, general-maıor Qaırat Kópbaev Adal Adam Youtube arnasyna bergen suhbatynda «zakaz» ister qandaı jaǵdaıda toqtaıtynyn aıtty, – dep habarlaıdy qandastar.kz

«Logıkalyq turǵydan qarasaq ta, aqtalyp shyqqan azamattarǵa zańsyz úkim kesken, olardy zańsyz qýdalap, tergegen, abaqtyda zańsyz ustaǵan tergeýshiler, prokýrorlarǵa, sýdıalarǵa jaza qoldanýy kerek. Biraq olardyń qylmystyq jaýapkershilikke tartylǵanyn estimeppin. Bálkim, tártiptik shara berilgen shyǵar. Ol da belgisiz.

Eger zańsyz úkim shyǵarǵany, zańsyz is qozǵaǵany úshin sýdıa, tergeýshiler sotty bolyp jatsa, «zakaz ister» azaıyp, qurdymǵa keter edi. Keıingi úsh jylda prokýrordyń protestimen 4 áskerı aqtaldy, biraq solardyń isin júrgizgen tergeýshi, úkim kesken sýdıa sottaldy degendi estigen joqpyn», – dedi ol.