گەولوگيالىق بارلاۋ جۇمىستارىنا ۇزدىك الەمدىك تاجىريبەنى ەنگىزۋ كەرەك

توقاەۆ الماتىداعى «عىلىم ورداسى» ورتالىعىندا عالىمدارمەن كەزدەستى. كەزدەسۋ بارىسىندا پرەزيدەنت ءبىزدىڭ عىلىم مەن ءبىلىم داۋىرىندە ءومىر ءسۇرىپ جاتقانىمىزدى اتاپ ءوتتى. قازاقستاننىڭ گۇلدەنۋى ءۇشىن ءبىز وسى سالالاردى دامىتۋعا ەرەكشە كوڭىل ءبولۋىمىز كەرەك.

«جاڭارتىلاتىن ەنەرگيا كوزدەرىن قارقىندى دامىتۋ جاعدايىندا ەكونوميكانى ارتاراپتاندىرۋعا باسا ءمان بەرۋ كەرەك. «جاسىل» سۋتەگى وندىرىسىندە الەۋەتىمىز مول. قازىردىڭ وزىندە بۇل سالادا سەرپىندى جوبالاردى جۇزەگە اسىرۋ كوزدەلگەن.

مۇناي حيمياسىندا ءداستۇرلى پلاستيك جانە جاڭا ماتەريالدار سياقتى قوسىمشا قۇنى جوعارى ونىمدەر شىعارۋدى جولعا قويۋ قاجەت. «جاسىل» ەكونوميكانىڭ دامۋى اككۋمۋلياتور وندىرىسىنە قاجەتتى سيرەك جانە سيرەك كەزدەسەتىن مەتالدارعا سۇرانىستى ارتتىرادى. مىسالى, ساراپشىلاردىڭ باعالاۋىنشا, كومىرتەگى بەيتاراپتىعىنا قول جەتكىزۋ ءۇشىن عاسىر ورتاسىنا قاراي ەۋروپاعا قازىرگىدەن 35 ەسە كوپ ليتي قاجەت بولادى. بىزدە وسى جانە وزگە دە مەتالداردىڭ مول قورى بار. گەولوگيالىق بارلاۋ جۇمىستارىنىڭ اۋقىمىن كەڭەيتىپ, بۇل سالاعا ۇزدىك الەمدىك تاجىريبەنى ەنگىزۋ قاجەت.

ماشينا جاساۋ باعىتىنىڭ بولاشاعى زور. ەلىمىزدە كولىك قۇراستىراتىن بىرقاتار كاسىپورىن جۇمىس ىستەيدى. جەرگىلىكتى ءوندىرىستىڭ ۇلەسىن جانە تەحنولوگيانىڭ يمپورتىن ارتتىرۋ كەرەك»,- دەدى قاسىم-جومارت توقاەۆ.

ايتا كەتەيىك, 31 مامىردا مەملەكەت باسشىسى الماتىعا ۇشىپ كەلىپ, ونى مەگاپوليس اكىمى ەربولات دوساەۆ قارسى الدى. پرەزيدەنت اۋەجايدىڭ جاڭا تەرمينالىندا بولدى. تەرمينالدىڭ اشىلۋى قارساڭىندا مەملەكەت باسشىسىنا قۇرىلىس بارىسى تۋرالى باياندالىپ, تىركەۋ, شەكارالىق جانە كەدەندىك باقىلاۋ ايماقتارى, باگاج بولىمشەسى تانىستىرىلدى.

سونداي-اق, قاسىم-جومارت توقاەۆتىڭ عىلىمي زيالى قاۋىم وكىلدەرىمەن, بيزنەس توپتارىمەن, بىرقاتار حالىقارالىق ۇيىمداردىڭ باسشىلارىمەن كەزدەسۋلەرى جوسپارلانعان.