گەرمانيادا ءولى تابىلعان ايگۇل سايلىباەۆانىڭ دەنەسىنەن پىشاق ىزدەرى تابىلدى

40 جاستاعى ايگۇل سايلىباەۆا شەففيلدتە (انگليا) وقىپ, كەيىن استانادا سۋديا بولىپ جۇمىس ىستەگەن. سوڭعى جىلدارى ول گەرمانيانىڭ باتىسىنداعى بەنسحايم قالاسىندا كۇيەۋىمەن, قىزىمەن جانە قايىن ەنەسىمەن بىرگە تۇرعان. 4 ماۋسىم كۇنى تاڭەرتەڭ ا.سايلىباەۆا ەكى جاسار قىزى جاكليندى بالاباقشاعا اپاردى. سودان بەرى ونى ەشكىم كورمەگەن. جەكسەنبى كۇنى ونىڭ دەنەسى قالا شەتىندەگى پلاستيك قاپشىقتان تابىلدى.

BILD Telegram ارناسىنىڭ حابارلاۋىنشا, مارقۇمنىڭ قولىندا, موينىندا جانە بەتىندە پىشاق جاراقاتتارى بولعان.

«ءبىز توبەلەس بولعان دەپ پايىمدايمىز, ايەلگە شابۋىل جاسالعان جانە ول ءوزىن قورعاۋعا تىرىسقان», – دەدى تەرگەۋشى.

پروكۋراتۋرا BILD ساۋالىنا بەرگەن جاۋابىندا بۇل ءىس بويىنشا بىردە-ءبىر كۇدىكتى جوق ەكەنىن ايتقان. ا.سايلىباەۆامەن ءبىر مەزگىلدە رەسەيدەن كەلگەن 49 جاستاعى قايىن ەنەسى ناتاليا دونتسوۆا جوعالىپ كەتتى. 4 ماۋسىمدا ول نەمەرەسىن بالاباقشادان ۇيىنە الىپ كەلگەن. سودان بەرى ونى ەشكىم كورمەگەن. قازىر جاكلين اكەسىمەن بىرگە تۇرىپ جاتىر. قازاقستاننان گەرمانياعا مارقۇمنىڭ 35 جاستاعى ءىنىسى قانات سايلىباەۆ كەلدى. ول اپكەسىن قازاقستاندا جەرلەگىسى كەلەتىنىن ايتتى.

«ءبىز وتە تىعىز قارىم-قاتىناستا بولدىق, ۋايىمدادىق. ايگۇل ادەتتە حابارلامالارعا بەس مينۋتتا جاۋاپ بەرەتىن. اتا-انامىز ايگۇلمەن كۇن سايىن حابارلاسىپ تۇردى, سوڭعى رەت 3 ماۋسىمدا تەلەفونمەن سويلەستى. 5 ماۋسىمدا ءبىز پوليتسياعا حابارلادىق. ايگۇل وتە اشىق جانە جاناشىر ادام بولدى. ول بارىنەن دە قىزىن جاقسى كوردى جانە سۇيىكتى انا بولدى. ايگۇلدىڭ ولىمىنە كىنالى ادام ءادىل جازا الارىنا جانە ادىلدىك ورنايتىنىنا سەنەمىن, – دەيدى قانات سايلىباەۆ.

ەسكە سالا كەتسەك, گەرمانيادا ەكس-سۋديا ايگۇل سايلىباەۆانىڭ زورلىق بەلگىلەرى بار ءمايىتى تابىلعانىن جازعان بولاتىنبىز.

سىرتقى ىستەر مينيسترلىگىنىڭ رەسمي وكىلى ايبەك سمادياروۆ ۆەدومستۆونىڭ ءباسپاسوز ءماسليحاتىندا گەرمانيادا جوعالعان قازاقستان ازاماتىنىڭ تۋىستارى گەرمانياعا جەتكەنىن ءمالىم ەتتى.

بۇرىنعى سۋديانىڭ جوعالعانى تۋرالى ونىڭ ءىنىسى قانات سايلىباەۆ حابارلادى.

سونداي-اق, نەمىس پوليتسياسى قر ازاماتشاسى ايگۇل سايلىباەۆانىڭ ولىمىنە قاتىستى تۇسىنىك بەردى.