جاڭالىقتار
گەرمانيادا جۇمباق جاعدايدا قازا تاپقان ەكس-سۋديانىڭ ءمايىتىن قازاقستانعا اكەلۋگە رۇقسات بەرىلدى
فوتو: قانات سايلىباەۆتىڭ جەكە مۇراعاتىنان
گەرمانيادا بەلگىسىز جاعدايدا قايتىس بولعان ايگۇل سايلىباەۆانىڭ ءمايىتىن قازاقستانعا الىپ كەتۋگە رۇقسات بەرىلدى. ونىمەن قازىر مارقۇمنىڭ اناسى مەن ءىنىسى اينالىسىپ جاتىر, — دەپ حابارلايدى Aikyn.kz كتك تەلەارناسىنا سىلتەمە جاساپ.
قانات سايلىباەۆتىڭ ايتۋىنشا, سۇيەگىن اكەلسە, تۋىستارى جۇما نەمەسە سەنبىدە ايگۇلدىڭ جانازاسىن وتكىزىپ, جەرلەمەك.
ەسكە سالايىق, بۇعان دەيىن استاناداعى سارىارقا اۋداندىق سوتىندا سۋديا بولىپ قىزمەت ەتكەن 40 جاستاعى قازاقستاندىق ايەل 4 ماۋسىم كۇنى بەنسحايم قالاسىندا جوعالىپ كەتىپ, ءمايىتى 12 كۇننەن كەيىن عانا قالا شەتىندەگى كول جاعاسىنان تابىلعان.
نەمىس تەرگەۋشىلەرى مارقۇمنىڭ بەتى, موينى مەن قولىندا پىشاق جاراقاتى بار ەكەنىن ايتتى. بۇل ءىس بويىنشا ءالى كۇنگە دەيىن كۇدىكتى جوق. ايگۇلمەن ءبىر ۋاقىتتا ونىڭ ەنەسى دە جوعالىپ كەتكەن. ول ءالى تابىلمادى.
