گيدرا ارالىنداعى ورمان ورتىنە قاتىستى جاۋاپكەرشىلىكتى قازاقستاندىق ميلليونەرلەر جالداعان كەمەنىڭ كاپيتانى ءوز موينىنا الدى

فوتو: اشىق دەرەككوز

گيدرا ارالىنداعى قاراعايلى ورمان ورتىنە قاتىستى جاۋاپكەرشىلىكتى جەكە چارتەرلىك ياحتانىڭ كاپيتانى ءوزموينىنا الدى, – دەپ حابارلايدى kursiv.kz

بۇل جايلى گرەكيا باسىلىمدارى حابارلادى. ايتا كەتەيىك, ورمانداعى ءورت قازاقستاندىق مۋلتيميلليونەرلەر وتشاشۋ ۇيىمداستىرعاننان كەيىن باستالعان.

گرەكيا باسىلىمدارىنىڭ حابارلاۋىنشا, 2 تامىز كۇنى ياحتا كاپيتانى ەكيپاجدىڭ باسقا مۇشەلەرىن اقتاپ, تۇسىنىكتەمە بەرگەن.

ءوز سوزىندە جەكە كەمە كاپيتانى 15 وتشاشۋ جيىنتىعىن الىپ, ونى تاسقا قويىپ, تەڭىزگە قاراي باعىتتاعانىن ايتقان. تۇتاتقاننان كەيىن ونىڭ 14-ءى ارالدان الىس, تەڭىزگە قاراي اتىلعان. ال بىرەۋى كەرى بۇرىلىپ, ارالدىڭ تىك بەتكەيىنە تۇسكەن. سالدارىنان وت شىققان.

«كاپيتان مۇنى باسقا ەكيپاج مۇشەلەرىنىڭ كومەگىنسىز ءوز باستاماسىمەن ورىنداعانىن, جالعا الۋشىلار بۇيرىق بەرمەگەنىن ايتقان. ءوز سوزىندە ەكيپاج مۇشەلەرىن تاڭعالدىرعىسى كەلگەنىن اتاپ وتكەن», – دەپ جازادى باسىلىم.

بۇل تەرگەۋ بارىسىن وزگەرتىپ, سوتقا تارتىلىپ جاتقان 13 ەكيپاج مۇشەسىنە قاتىستى قۇقىقتىق وزگەرىستەر بولۋى مۇمكىن ەكەنى ايتىلادى.

ال مۇنىڭ الدىندا بەرگەن كۋالىگىنە سول كەزدەگى دۇربەلەڭ اسەر ەتكەنىن, سوعان بايلانىستى جاعدايدى مۇلدە باسقاشا تۇسىندىرگەنىن مالىمدەگەن. ال بۇعان دەيىنگى سوزىندە ياحتا كاپيتانى تەرگەۋ كەزىندە گيدرا ارالىندا بولعان ورتكە ەشقانداي قاتىسى جوق ەكەنىن ايتقان.

ايتا كەتسەك, 25 ماۋسىم كۇنى گيدرا ارالىنداعى قاراعايلى ورمان ورتەنگەنى بەلگىلى بولدى. ول ورتكە قازاقستاندىق مۋلتيميلليونەرلەر – Halyk Bank  باسقارما توراعاسى ءۇمىت شاياحمەتوۆا مەن Forbes تىزىمىندەگى قازاقستاندىق كاسىپكەر دانيار ابىلعازيننىڭ قاتىسى بار ەكەنى ايتىلدى.

شەتەل باق-تارى كەمەدە ءۇمىت شاياحمەتوۆانىڭ كۇيەۋى مەن قىزى, دانيار ابىلعازيننىڭ ايەلى جانە تاعى بىرنەشە ادام بولعانى تۋرالى جازدى. وقيعا بولعان كۇنى ەرتەڭىنە دانيار ابىلعازيننىڭ ۇشاعى افينادان الماتىعا ۇشىپ كەتكەنى بەلگىلى بولدى.

بۇل جاعدايدان بىرنەشە كۇن وتكەن سوڭ, ياحتانى جالعا العان دانيار ابىلعازين تۇسىنىكتەمە بەرىپ, ارالداعى ورتكە ءوزىنىڭ قاتىسى جوق ەكەنىن ايتتى. ول وزدەرىنىڭ قۇقىق بۇزۋشىلىق جاساعانى تۋرالى اقپاراتتى ءۇزىلدى-كەسىلدى جوققا شىعارىپ, ءورت تۋدىراتىنداي ارەكەت جاساماعانىن جەتكىزدى.

«ياحتاداعى ءورت قاۋىپسىزدىگى ەرەجەلەرىن قاتاڭ ساقتادىق. مەن دە, مەنىڭ قوناقتارىم دا ياحتا ەكيپاجىنان نەمەسە ءۇشىنشى تاراپتاردان ورتكە اكەلۋى مۇمكىن قانداي دا ءبىر ارەكەتتەردى جاساۋدى سۇرامادىق»,- دەپ مالىمدەگەن ميلليونەر.