Gıdra aralyndaǵy orman órtine qatysty jaýapkershilikti qazaqstandyq mıllıonerler jaldaǵan kemeniń kapıtany óz moınyna aldy

Foto: ashyq derekkóz

Gıdra aralyndaǵy qaraǵaıly orman órtine qatysty jaýapkershilikti jeke charterlik ıahtanyń kapıtany ózmoınyna aldy, – dep habarlaıdy kursiv.kz

Bul jaıly Grekııa basylymdary habarlady. Aıta keteıik, ormandaǵy órt qazaqstandyq mýltımıllıonerler otshashý uıymdastyrǵannan keıin bastalǵan.

Grekııa basylymdarynyń habarlaýynsha, 2 tamyz kúni ıahta kapıtany ekıpajdyń basqa múshelerin aqtap, túsinikteme bergen.

О́z sózinde jeke keme kapıtany 15 otshashý jıyntyǵyn alyp, ony tasqa qoıyp, teńizge qaraı baǵyttaǵanyn aıtqan. Tutatqannan keıin onyń 14-i araldan alys, teńizge qaraı atylǵan. Al bireýi keri burylyp, araldyń tik betkeıine túsken. Saldarynan ot shyqqan.

«Kapıtan muny basqa ekıpaj músheleriniń kómeginsiz óz bastamasymen oryndaǵanyn, jalǵa alýshylar buıryq bermegenin aıtqan. О́z sózinde ekıpaj múshelerin tańǵaldyrǵysy kelgenin atap ótken», – dep jazady basylym.

Bul tergeý barysyn ózgertip, sotqa tartylyp jatqan 13 ekıpaj múshesine qatysty quqyqtyq ózgerister bolýy múmkin ekeni aıtylady.

Al munyń aldynda bergen kýáligine sol kezdegi dúrbeleń áser etkenin, soǵan baılanysty jaǵdaıdy múlde basqasha túsindirgenin málimdegen. Al buǵan deıingi sózinde ıahta kapıtany tergeý kezinde Gıdra aralynda bolǵan órtke eshqandaı qatysy joq ekenin aıtqan.

Aıta ketsek, 25 maýsym kúni Gıdra aralyndaǵy qaraǵaıly orman órtengeni belgili boldy. Ol órtke qazaqstandyq mýltımıllıonerler – Halyk Bank  basqarma tóraǵasy Úmit Shaıahmetova men Forbes tizimindegi qazaqstandyq kásipker Danııar Ábilǵazınniń qatysy bar ekeni aıtyldy.

Shetel BAQ-tary kemede Úmit Shaıahmetovanyń kúıeýi men qyzy, Danııar Ábilǵazınniń áıeli jáne taǵy birneshe adam bolǵany týraly jazdy. Oqıǵa bolǵan kúni erteńine Danııar Ábilǵazınniń ushaǵy Afınadan Almatyǵa ushyp ketkeni belgili boldy.

Bul jaǵdaıdan birneshe kún ótken soń, ıahtany jalǵa alǵan Danııar Ábilǵazın túsinikteme berip, araldaǵy órtke óziniń qatysy joq ekenin aıtty. Ol ózderiniń quqyq buzýshylyq jasaǵany týraly aqparatty úzildi-kesildi joqqa shyǵaryp, órt týdyratyndaı áreket jasamaǵanyn jetkizdi.

«Iahtadaǵy órt qaýipsizdigi erejelerin qatań saqtadyq. Men de, meniń qonaqtarym da ıahta ekıpajynan nemese úshinshi taraptardan órtke ákelýi múmkin qandaı da bir áreketterdi jasaýdy suramadyq»,- dep málimdegen mıllıoner.