گوسدۋما دەپۋتاتى: قازاقستاننىڭ بۇكىل اۋماعى — رەسەيدىڭ سىيلىعى

دەپۋتات نە دەيدى

فەدوروۆ بۇل پىكىرىن RTVI تەلەارناسىنا بەرگەن سۇحباتىندا ايتتى. ول قازاقستانعا كىرۋگە تىيىم سالىنعان رەسەيلىكتەر تىزىمىندە ەكەنىن راستاپ, رەسپۋبليكا تۋرالى جاعىمدى پىكىردە ەكەنىن ءبىلدىردى. ول كەزىندە بايقوڭىردا اسكەري قىزمەتتە بولعانىن, سول ءوڭىردى جاقسى كورەتىنىن دە ەسكە الدى.

دەگەنمەن, ونىڭ ايتۋىنشا, قازاقستان تاۋەلسىزدىك العان كەزدە «رەسەيدەن جەر تۇرىندەگى سىيلىق العانىن» مويىنداۋى ءتيىس.

– ەگەر ماسەلەنى قۇقىقتىق تۇرعىدا قاراستىراتىن بولساق, مەن مۇنى بىرنەشە رەت ايتتىم – قازاقستان 1991 جىلى قۇرىلعان كەزدە ءوزىنىڭ بۇكىل اۋماعىن رەسەيدەن سىيلىق رەتىندە الدى. سەبەبى كسرو قۇرامىنان وداقتاس رەسپۋبليكانىڭ شىعۋىنا بايلانىستى ماسەلەلەردى رەتتەيتىن №1409-I زاڭىنا سايكەس, ءبىر رەسپۋبليكادان ەكىنشىسىنە اۋماق ءوتۋى ءتيىس بولعان جاعدايدا كەلىسسوزدەر جۇرگىزىلۋى كەرەك ەدى. بۇل جاعدايدا ونداي كەلىسسوزدەر بولعان جوق. ەلدىڭ ءوزى تاماشا, بىراق سىيلىق فاكتىسى دە بار. مەن تەك سونى ايتتىم. قازاقستاندا بىرەۋلەر بۇعان رەنجىگەن سياقتى. بىراق سىيلىق ءۇشىن رەنجۋدىڭ قاجەتى نە? بۇل – شىندىق, – دەدى ول RTVI ارناسىنا بەرگەن سۇحباتىندا.

فەدوروۆ بۇرىن نە دەگەن ەدى

بۇل فەدوروۆتىڭ قازاقستان اۋماعىنا بايلانىستى العاشقى مالىمدەمەسى ەمەس. 2020 جىلدىڭ سوڭىندا ول مەمدۋماداعى ارىپتەسى ۆياچەسلاۆ نيكونوۆتى قولداپ, قازاقستاننىڭ قازىرگى اۋماعىن «ۇلكەن سىيلىق» دەپ اتاعان ەدى. ول كەزدە نيكونوۆ بۇل پىكىرىن «پەرۆىي كانال» ەفيرىندە ايتقان بولاتىن. فەدوروۆ پەن وزگە دەپۋتاتتار «كسرو-دان زاڭسىز شىعۋ», «تەرريتوريانى قايتارۋ» جانە 1991 جىلعى شەشىمدەردى قايتا قاراۋ ماسەلەسىن ءجيى قوزعايدى.

كونتەكست

بۇعان دەيىن Deutsche Welle قازاقستاندا ەلگە كىرۋگە تىيىم سالىنعان تۇلعالاردىڭ «قارا ءتىزىمى» بار ەكەنىن حابارلاعان. ول تىزىمدە رەسەي مەمدۋماسىنىڭ دەپۋتاتتارى پەتر تولستوي, ەۆگەني فەدوروۆ, كونستانتين زاتۋلين, ۆياچەسلاۆ نيكونوۆ, تينا كاندەلاكي, تەلەجۇرگىزۋشى تيگران كەوسايان, فيلوسوف الەكساندر دۋگين, روسسوترۋدنيچەستۆو باسشىسى ەۆگەني پريماكوۆ جانە ساياساتتانۋشى نيكيتا مەندكوۆيچ بار.