Álem jańalyqtary
Gosdýma depýtaty: Qazaqstannyń búkil aýmaǵy — Reseıdiń syılyǵy
Reseı memlekettik dýmasynyń depýtaty Evgenıı Fedorov Qazaqstanǵa qatysty kezekti daýly málimdemesin jasap, elimizdiń búkil aýmaǵyn «Reseıdiń syılyǵy» dep atady, dep habarlaıdy qandastar.kz Ulysmedia.kz-ke silteme jasap.
DEPÝTAT NE DEIDI
Fedorov bul pikirin RTVI telearnasyna bergen suhbatynda aıtty. Ol Qazaqstanǵa kirýge tyıym salynǵan reseılikter tiziminde ekenin rastap, respýblıka týraly jaǵymdy pikirde ekenin bildirdi. Ol kezinde Baıqońyrda áskerı qyzmette bolǵanyn, sol óńirdi jaqsy kóretinin de eske aldy.
Degenmen, onyń aıtýynsha, Qazaqstan táýelsizdik alǵan kezde «Reseıden jer túrindegi syılyq alǵanyn» moıyndaýy tıis.
– Eger máseleni quqyqtyq turǵyda qarastyratyn bolsaq, men muny birneshe ret aıttym – Qazaqstan 1991 jyly qurylǵan kezde óziniń búkil aýmaǵyn Reseıden syılyq retinde aldy. Sebebi KSRO quramynan odaqtas respýblıkanyń shyǵýyna baılanysty máselelerdi retteıtin №1409-I zańyna sáıkes, bir respýblıkadan ekinshisine aýmaq ótýi tıis bolǵan jaǵdaıda kelissózder júrgizilýi kerek edi. Bul jaǵdaıda ondaı kelissózder bolǵan joq. Eldiń ózi tamasha, biraq syılyq faktisi de bar. Men tek sony aıttym. Qazaqstanda bireýler buǵan renjigen sııaqty. Biraq syılyq úshin renjýdiń qajeti ne? Bul – shyndyq, – dedi ol RTVI arnasyna bergen suhbatynda.
FEDOROV BURYN NE DEGEN EDI
Bul Fedorovtyń Qazaqstan aýmaǵyna baılanysty alǵashqy málimdemesi emes. 2020 jyldyń sońynda ol memdýmadaǵy áriptesi Vıacheslav Nıkonovty qoldap, Qazaqstannyń qazirgi aýmaǵyn «úlken syılyq» dep ataǵan edi. Ol kezde Nıkonov bul pikirin «Pervyı kanal» efırinde aıtqan bolatyn. Fedorov pen ózge depýtattar «KSRO-dan zańsyz shyǵý», «terrıtorııany qaıtarý» jáne 1991 jylǵy sheshimderdi qaıta qaraý máselesin jıi qozǵaıdy.
KONTEKST
Buǵan deıin Deutsche Welle Qazaqstanda elge kirýge tyıym salynǵan tulǵalardyń «qara tizimi» bar ekenin habarlaǵan. Ol tizimde Reseı memdýmasynyń depýtattary Petr Tolstoı, Evgenıı Fedorov, Konstantın Zatýlın, Vıacheslav Nıkonov, Tına Kandelakı, telejúrgizýshi Tıgran Keosaıan, fılosof Aleksandr Dýgın, Rossotrýdnıchestvo basshysy Evgenıı Prımakov jáne saıasattanýshy Nıkıta Mendkovıch bar.
