ءبىلىم
گرانت كونكۋرسىنا قۇجات تاپسىرعاندا نەنى ءبىلۋ كەرەك?
فوتو: .gov.kz
بۇگىن قازاقستان ۇبت-نىڭ ناتيجەسى بويىنشا گرانت كونكۋرسىنا قۇجاتتار قابىلداۋ باستالدى. تالاپكەرلەر 20 شىلدەگە دەيىن جوعارى وقۋ ورنىن تاڭداپ, قۇجات وتكىزۋى كەرەك. ال سۋ تاسقىنىنان زارداپ شەككەن اقمولا, اقتوبە, اتىراۋ, باتىس قازاقستان, قوستاناي, سولتۇستىك قازاقستان وبلىستارىنىڭ تالاپكەرلەرىنە قوسىمشا ءتورت كۇن بەرىلىپ وتىر. Sputnik قازاقستان گرانت كونكۋرسىنا قاتىستى ماڭىزدى اقپاراتتى ۇسىنادى.
كۆوتانى ەسكەرۋ كەرەك
بۇگىندە زاڭ بويىنشا گرانتتاردىڭ ناقتى ءبىر بولىگى كۆوتامەن الەۋمەتتىك جاعىنان وسال توپتار مەن قانداستار اراسىندا تاراتىلادى. ولار:
I جانە II توپ مۇگەدەكتىگى بار ادامدار – 1%;
اۋىل مەكتەبىن بىتىرگەندەر – 35%;
قانداستار – 4%;
جەتىم بالالار جانە كامەلەت جاسقا دەيىن اتا-اناسىنان ايىرىلعان جاستار – 1%;
وڭىرلەرگە قونىس اۋدارعان اۋىل جاستارى («سەرپىن» باعدارلاماسى) – 5%;
كوپبالالى وتباسىدان شىققان بالالار – 5%;
تولىق ەمەس وتباسىلاردىڭ بالالارى – 1%;
باسقا مەملەكەتتەردىڭ اۋماعىندا بولعان ۇرىس قيمىلدارىنىڭ ارداگەرلەرى جانە ۇلى وتان سوعىسىنىڭ ارداگەرلەرىنە تەڭەستىرىلگەن ارداگەرلەر – 0,5%.
كۆوتانى قالاي ەسەپتەۋ كەرەك?
كۆوتا دەگەنىمىز, بولىنگەن جالپى گرانتتاردىڭ پايىزدىق ۇلەسى. مىسالى, بيىل «پەداگوگيكالىق عىلىمدار» باعىتى بويىنشا 13 735 گرانت ءبولىنىپ وتىر. دەمەك, سونىڭ ىشىندە 137 گرانت نەمەسە 1 پروتسەنتى جەتىم بالالارعا, 549 گرانت نەمەسە 4 پروتسەنتى قانداستارعا, 687 گرانت نەمەسە 5 پروتسەنتى كوپبالالى وتباسىدان شىققان بالالارعا ارنالعان.
سول سياقتى جالپى ماماندىققا بولىنگەن گرانتتاردىڭ 35% پروتسەنتى اۋىل كۆوتاسىمەن بەرىلەدى. ونى دا ۇپاي سانىمەن اۋىلدىڭ تۇلەكتەرى اراسىندا تاراتادى.
سوسىن اۋىل كۆوتاسى اۋىلدىڭ الەۋمەتتىك-ەكونوميكالىق دامۋىن ايقىندايتىن ماماندىقتار – پەداگوگيكا, IT, اۋىل شارۋاشىلىق, ۆەتەريناريا, مەديتسينالىق جانە تاعى باسقا باعىتتار بويىنشا بەرىلەدى.
اۋىل كۆوتاسى ءۇشىن انىقتاما الۋدىڭ قاجەتى جوق. اۋىلدىق جەردە مەكتەپتى بىتىرگەن تالاپكەر تۋرالى اقپارات بازادا بولادى.
شىعارماشلىق ەمتيحان تاپسىراتىندار نە ىستەيدى?
شىعارماشىلىق ماماندىقتاردى تاڭداعان تالاپكەرلەر تاڭداعان جوعارى وقۋ ورنىنا قۇجات تاپسىرىپ, 7 شىلدە – 15 تامىز ارالىعىندا ەمتيحان تاپسىرۋى قاجەت. ال اقمولا وبلىسى, اقتوبە وبلىسى, اتىراۋ وبلىسى, باتىس قازاقستان وبلىسى, قوستاناي وبلىسى, سولتۇستىك قازاقستان وبلىسىنىڭ تالاپكەرلەرى شىعارماشىلىق ەمتيحاندى ۇبت-دان كەيىن تاپسىرا بەرەدى.
شىعارماشىلىق ەمتيحاندار ءداستۇرلى فورماتتا, ياعني وفلاين بولادى. ال گرانت كونكۋرسىنا قاتىسۋ ءۇشىن تەك ءبىر ماماندىق جانە ءبىر جوعارى وقۋ ورنىن تاڭداۋعا بولادى.
بەس ءپان بويىنشا ۇبت تاپسىرعان تالاپكەرلەر (قازاقستان تاريحى جانە وقۋ ساۋاتتىلىعى بالدارىن الىپ) شىعارماشىلىق دايىندىقتى تالاپ ەتەتىن ءبىر ببت-نى تاڭداي الادى.
«سەرپىن» باعدارلاماسىنا 3 903 گرانت ءبولىندى
قازاقستاندا «سەرپىن» جوباسىنىڭ قولعا الىنعانىنا ءبىراز ۋاقىت بولدى. وسى باعدارلامانىڭ نەگىزگى ماقساتى – وڭتۇستىك وڭىرلەرىنىڭ جاستارىن كادر تاپشىلىعىن كورىپ وتىرعان ايماقتاردا وقىتتس جانە بىلىكتى ماماندار دايارلاۋ.
بيىل «سەرپىن» باعدارلاماسىنا 3 903 گرانت ءبولىنىپ وتىر. ماماندىقتار:
پەداگوگيكا – 2500-دەن استام;
ينجەنەريا, وڭدەۋ جانە قۇرىلىس سالاسى – 700-گە جۋىق;
IT – 300-گە جۋىق;
گرانت اۋىل شارۋاشىلىعى جانە بيورەسۋرستار – 70-كە جۋىق.
وسى جوبا بويىنشا گرانتقا تۇسكەن تۇلەكتەر شاكىرتاقى الادى جانە جاتاقحانامەن قامتاماسىز ەتىلەدى.
«سەرپىنگە» بەس وبلىس – تۇركىستان, قىزىلوردا, جامبىل, الماتى مەن جەتىسۋ وبلىستارىنىڭ اۋىل تۇلەكتەرى قاتىسا الادى. گرانتتار سولتۇستىك قازاقستان, اقمولا, شىعىس قازاقستان, اباي, پاۆلودار, ۇلىتاۋ, قاراعاندى مەن قوستاناي وبلىستارىندا ورنالاسقان جوعارى وقۋ ورىندارىنا ءبولىندى.
باعدارلامانىڭ نەگىزگى شارتىنا سايكەس, وقۋ اياقتاعان سوڭ 11 ايماقتىڭ بىرەۋىندە 2 جۇمىس ىستەپ, گرانتتى وتەۋ قاجەت.
گرانتقا ءتۇسۋ ءۇشىن ءاربىر ۋنيۆەرسيتەت ناقتى ماماندىق بوينىشا بەلگىلەنگەن شەكتى بالداردى دا ەسكەرۋ كەرەك. ونى مىنا جەردەن كورۋگە بولادى.
گرانت كونكۋرسىنا قانداي قۇجاتتار تاپسىرۋ كەرەك?
گرانت كونكۋرسىنا قاتىسۋ ءۇشىن قۇجاتتاردى جوعارى وقۋ ورىندارىنىڭ قابىلداۋ كوميسسيالارى ارقىلى وفلاين جانە eGov ارقىلى ونلاين تاپسىرۋعا بولادى.
قۇجاتتاردىڭ ءتىزىمى:
جەكە كۋالىك;
ۇبت سەرتيفيكاتى;
3ح4 كولەمىندەگى فوتو;
ورتا ءبىلىم تۋرالى اتتەستات (كوللەدج تۇلەكتەرى ءۇشىن ديپلوم);
جەڭىلدەتىلگەن سانات بويىنشا كونكۋرسقا قاتىسۋ ءۇشىن راستايتىن قۇجاتتار.
ال B167 ۇشۋ اپپاراتتارىن جانە قوزعالتقىشتاردى ۇشىرىپ پايدالانۋ بببت ءۇشىن دارىگەرلىك ۇشۋ-ساراپتامالىق كوميسسياسىنىڭ مەديتسينالىق كۋالاندىرۋى كەرەك.
قانداستار ۇلتى (قازاق) كورسەتىلگەن شەتەل تولقۇجاتىن ۇسىنادى. ولار ءۇشىن ۇبت-نىڭ شەكتى بالدارى بەكىتىلمەگەن.
ۇبت-نىڭ ناتيجەسى قانداي?
بيىل رەسپۋبليكا بويىنشا 186 مىڭنان استام ادام مەكتەپ ءبىتىردى. بارلىعى دەرلىك نەگىزگى ۇبت-دان باعىن سىناۋعا شەشىم قابىلدادى. ال گرانتتاردىڭ سانى ەكى ەسە از, 79 مىڭعا جۋىق بولىپ تۇر.
ۇبت-نىڭ ناتيجەسى:
تالاپكەرلەردىڭ 77 پروتسەنتى شەكتى بالل جينادى;
ورتاشا بالل – 69 بالل;
ەڭ جوعارى بالل – 140 بالل.
بۇدان بولەك, تەستىلەۋگە ەرەكشە ءبىلىم بەرۋ قاجەتتىلىگى بار 620 تالاپكەر قاتىستى. ەرەجە بۇزعانى ءۇشىن 502 ادامنىڭ ناتيجەلەرى جويىلدى. 154 ادام اۋديتوريادان شىعارىلدى, ال بەينەجازبالاردى تەكسەرگەننەن كەيىن تاعى 18 ادامنىڭ ناتيجەسى جويىلدى.
سارالانعان گرانتتار بار
بيىل پيلوتتىق رەجيمدە سارالانعان گرانتتار ءبولىندى. جالپى سانى – 300. ونى ەكى باعىتقا بەرىپ وتىر. ولار:
پەداگوگيكالىق عىلىمدار – 150 گرانت;
الەۋمەتتىك عىلىمدار, جۋرناليستيكا جانە اقپارات – 150 گرانت.
سارالانعان گرانتتاردىڭ شارتىنا سايكەس, وقۋ اقسىنىڭ 50 پروتسەنتىن مەملەكەت, ال قالعانىن جارتىسىن ستۋدەنتتىڭ ءوزى تولەيدى.
سارالانعان گرانت كونكۋرسىنا قاتىسۋ ءۇشىن قوسىمشا قۇجات تاپسىرۋدىڭ قاجەتى جوق. ۇبت-نىڭ ناتيجەسى بويىنشا بالل سانى جاعىنان گرانت العانداردان كەيىن تۇرعان تالاپكەرلەر سارالانعان گرانتقا يە بولادى.
گرانت كونكۋرسىنىڭ ناتيجەسى 10 تامىزعا دەيىن جاريالانادى.
ايتا كەتەرى, بۇعان دەيىن Sputnik قازاقستان عىلىم جانە جوعارى ءبىلىم مينيسترلىگىنە حابارلاسىپ, ۇبت ناتيجەسىنە قاراماي, تەگىن وقۋعا قالاي تۇسۋگە بولاتىنىن بىلگەن.
