گرەكيادا كەمەدە وتشاشۋ اتىپ, ورمان ورتىنە سەبەپ بولعان تۋريستەردىڭ اراسىندا قازاقستاندىق وليگارح بولعان – باق

فوتو: www.trt.net.tr

گرەكيادا كەمەدە وتشاشۋ اتىپ, ورمان ورتىنە سەبەپ بولعان تۋريستەردىڭ اراسىندا قازاقستاندىق وليگارح بولۋى مۇمكىن. بۇل تۋرالى Stan.kz اقپارات اگەنتتىگى حالىقارالىق OCCRP باسىلىمىنا سىلتەمە جاساپ حابارلايدى.

باسىلىمنىڭ مالىمەتىنشە, گيدرا ارالىنداعى ءورت 300 000 شارشى مەتر اۋماقتى شارپىعان.

گرەكيانىڭ ۇلتتىق ءورت ءسوندىرۋ قىزمەتى 22 ماۋسىم كۇنى كۇدىكتى دەپ تانىلعان 13 ادامنىڭ قاماۋعا العانىن حابارلادى. ال ءبىر اپتالىق جالعا الۋ قۇنى 250 مىڭ ەۋرو بولاتىن ليۋكس ياحتاداعى قوناقتاردان ەشكىم ۇستالماعان.

«قالا اكىمشىلىگى بارلىق جاۋاپتىلارعا شارا قولدانۋ جانە وتەماقى تالاپ ەتۋ ءۇشىن تەرگەۋدىڭ ناتيجەسىن كۇتىپ وتىر», – دەلىنگەن گيدرا مەرى دجورگوس كوۋكۋداكيستىڭ مالىمدەمەسىندە.

باسىلىمنىڭ قول جەتكىزگەن اقپاراتى بويىنشا, Persephony I ياحتاسىنىڭ قوناقتارىنىڭ اراسىندا جەتى قازاقستاندىق بولعان. ولاردىڭ قاتارىندا قازاقستاندىق وليگاحر دانيار ابىلعازيننىڭ بولعانى تۋرالى اقپارات بار.

ءورت بولعان كۇننىڭ ەرتەڭىندە ابىلعازين ءجيى پايدالاناتىن جەكە ۇشاعىمەن افينى اۋەجايىنان الماتىعا ۇشقانى رەيس جازبالارىندا كورسەتىلگەن.

باسىلىمنىڭ مالىمەتىنشە, كەمە جازبالارىندا سول كۇنى كەمەدە ابىلعازيننىڭ ۇلى مەن ايەلى ايدان سۇلەيمەنوۆانىڭ دا بولعانى جازىلعان. باسقا قوناقتاردىڭ قاتارىندا قازاقستاننىڭ ەڭ ءىرى قارجى ينستيتۋتى حالىق بانكىنىڭ باس ديرەكتورى ءۇمىت شاياحمەتوۆا مەن ونىڭ كۇيەۋى, KMG International NV ۇلتتىق مۇناي كومپانياسىنىڭ بۇرىنعى توپ-مەنەدجەرى بەيىمبەت شاياحمەتوۆ پەن ولاردىڭ قىزى دا بولعان.

ەسكە سالساق, بۇعان دەيىن گرەكيادا ياحتا جالداعان قازاقستاندىقتار وتشاشۋ ارقىلى ارالدى ورتەپ جىبەرگەنى تۋرالى اقپارات تاراعان ەدى. الايدا قازاقستاننىڭ سىرتقى ىستەر مينيسترلىگى مالىمدەمە جاساپ, گرەكيادا ورمان ءورتى ءۇشىن ۇستالعاندار اراسىندا قازاقستان ازاماتتارى جوق ەكەنىن مالىمدەدى.