Grekııada kemede otshashý atyp, orman órtine sebep bolǵan týrısterdiń arasynda qazaqstandyq olıgarh bolǵan – BAQ

Foto: www.trt.net.tr

Grekııada kemede otshashý atyp, orman órtine sebep bolǵan týrısterdiń arasynda qazaqstandyq olıgarh bolýy múmkin. Bul týraly Stan.kz aqparat agenttigi halyqaralyq OCCRP basylymyna silteme jasap habarlaıdy.

Basylymnyń málimetinshe, Gıdra aralyndaǵy órt 300 000 sharshy metr aýmaqty sharpyǵan.

Grekııanyń ulttyq órt sóndirý qyzmeti 22 maýsym kúni kúdikti dep tanylǵan 13 adamnyń qamaýǵa alǵanyn habarlady. Al bir aptalyq jalǵa alý quny 250 myń eýro bolatyn lıýks ıahtadaǵy qonaqtardan eshkim ustalmaǵan.

«Qala ákimshiligi barlyq jaýaptylarǵa shara qoldaný jáne ótemaqy talap etý úshin tergeýdiń nátıjesin kútip otyr», – delingen Gıdra meri Djorgos Koýkýdakıstiń málimdemesinde.

Basylymnyń qol jetkizgen aqparaty boıynsha, Persephony I ıahtasynyń qonaqtarynyń arasynda jeti qazaqstandyq bolǵan. Olardyń qatarynda qazaqstandyq olıgahr Danııar Ábilǵazınniń bolǵany týraly aqparat bar.

О́rt bolǵan kúnniń erteńinde Ábilǵazın jıi paıdalanatyn jeke ushaǵymen Afıny áýejaıynan Almatyǵa ushqany reıs jazbalarynda kórsetilgen.

Basylymnyń málimetinshe, keme jazbalarynda sol kúni kemede Ábilǵazınniń uly men áıeli Aıdan Súleımenovanyń da bolǵany jazylǵan. Basqa qonaqtardyń qatarynda Qazaqstannyń eń iri qarjy ınstıtýty Halyq bankiniń bas dırektory Úmit Shaıahmetova men onyń kúıeýi, KMG International NV ulttyq munaı kompanııasynyń burynǵy top-menedjeri Beıimbet Shaıahmetov pen olardyń qyzy da bolǵan.

Eske salsaq, buǵan deıin Grekııada ıahta jaldaǵan qazaqstandyqtar otshashý arqyly araldy órtep jibergeni týraly aqparat taraǵan edi. Alaıda Qazaqstannyń syrtqy ister mınıstrligi málimdeme jasap, Grekııada orman órti úshin ustalǵandar arasynda Qazaqstan azamattary joq ekenin málimdedi.