الەم جاڭالىقتارى
گرەكياداعى ورمان ءورتى: سەگىز قازاقستاندىققا ايىپ تاعىلدى
فوتو: azattyq-ruhy.kz
گرەكيا پروكۋرورلارى ءبىر اپتا بۇرىن سارونيك ارالىنداعى گيدرادا بولعان ورتكە بايلانىستى جەكە جالدامالى ياحتاداعى سەگىز قازاقستاندىق جولاۋشىعا ايىپ تاعىپ وتىر. بۇل تۋرالى Stan.kz اقپارات اگەنتتىگى ەkathimerini باسىلىمىنا سىلتەمە جاساپ حابارلايدى.
ياحتادا بولعان ەكى كامەلەتكە تولماعان تۋريستكە ايىپ تاعىلمادى. گرەك بيلىگى قازاقستانعا كومەك سۇراپ جۇگىنگەن. سەبەبى ياحتا جالداۋشىلارى بيلىكتىڭ سۇراۋىن كۇتپەستەن گرەكيادان كەتىپ قالعان.
ايىپ تاعىلۋىنا پروكۋروردىڭ تاپسىرىسى بويىنشا ءورت ورنىندا جۇرگىزىلگەن سوت-مەديتسينالىق ساراپتاماسى كەزىندە تابىلعان جاڭا دالەلدەر سەبەپ بولعان. ءورت سوندىرۋشىلەر جالىن شىققان شىعاناقتا وتشاشۋلاردىڭ قالدىقتارىن تاپقان.
ياحتا كاپيتانى مەن كومەكشىسى ۇستالىپ, قالعاندارى شەكتەۋلەرمەن كەپىلگە بوساتىلدى.
سونداي-اق پيرەي پروكۋراتۋراسىنىڭ گيدراداعى ءورت وقيعاسى بويىنشا ءورت سوندىرۋشىلەر مەن پورت باسشىلىعىنىڭ ارەكەتىنە قاتىستى الدىن الا تەرگەۋدى باستاعانى حابارلاندى. ياحتانى جالعا الۋشىلاردىڭ ورتكە قاتىسى بار دەگەن كۇدىككە قاراماستان گرەكيادان كەتۋىنە مۇمكىندىك بەرگەن كەز كەلگەن قاداعالاۋدى تەكسەرۋ باستى نازاردا.
ايتا كەتەيىك, بۇعان دەيىن گرەكيادا ياحتا جالداعان قازاقستاندىقتار وتشاشۋ ارقىلى ارالدى ورتەپ جىبەردى دەگەن اقپارات تاراعان ەدى. كەيىننەن ەلىمىزدىڭ سىرتقى ىستەر مينيسترلىگى گرەكيادا ورمان ورتەدى دەگەن كۇدىكتىلەر اراسىندا قازاقستان ازاماتتارى جوق ەكەنىن مالىمدەدى.
