گرەكيانى ءورت شارپىدى

فوتو: ۆيدەودان كادر

سوڭعى ەكى تاۋلىكتە گرەكيادا 150-دەن استام ءورت تۇتانىپ, ەلدى الاڭداتقان جاعدايعا اينالدى, دەپ حابارلايدى qandastar.kz

قاتتى جەل مەن شىجىعان اپتاپ ىستىق شاعىن وشاقتاردى الىپ جالىن قابىرعاسىنا اينالدىرىپ, تۇرعىن ۇيلەرگە جاقىنداپ بارادى.

احۋال ۋشىعىپ كەتكەندىكتەن, 20 ەلدى مەكەننىڭ تۇرعىندارىن شۇعىل كوشىرۋگە تۋرا كەلدى. ادامدار اۆتوبۋستارمەن, جەڭىل كولىكتەرمەن, ءتىپتى بالىقشىلاردىڭ قايىقتارىمەن قاۋىپسىز ايماقتارعا شىعارىلدى.

ەڭ كۇردەلى جاعداي احەيا, پرەۆەزا, يون ارالدارى مەن حيوس ارالىندا تىركەلىپ وتىر. Euronews مالىمەتىنشە, ءتىلسىز جاۋمەن كۇرەسكە 5 مىڭعا جۋىق ءورت ءسوندىرۋشى مەن 33 ۇشاق جۇمىلدىرىلعان. قۇتقارۋ قىزمەتىنىڭ بىرنەشە وكىلى جاراقات الىپ, اۋرۋحاناعا تۇسكەن.

«بۇل كۇندەر سوڭعى جىلدارداعى ءورت سوندىرۋشىلەر ءۇشىن ەڭ اۋىر سىناققا اينالدى», — دەدى گرەكيا ءورت سوندىرۋشىلەر وداعىنىڭ توراعاسى.

جالىن تەك گرەكيانى عانا شارپىپ تۇرعان جوق. شىلدە ايىنىڭ سوڭىندا تۇركيا مەن كيپردە دە ورمان ورتتەرى تۇتانىپ, تۋريستىك ايماقتارعا قاۋىپ توندىرگەن ەدى.