Grekııany órt sharpydy

Foto: vıdeodan kadr

Sońǵy eki táýlikte Grekııada 150-den astam órt tutanyp, eldi alańdatqan jaǵdaıǵa aınaldy, dep habarlaıdy qandastar.kz

Qatty jel men shyjyǵan aptap ystyq shaǵyn oshaqtardy alyp jalyn qabyrǵasyna aınaldyryp, turǵyn úılerge jaqyndap barady.

Ahýal ýshyǵyp ketkendikten, 20 eldi mekenniń turǵyndaryn shuǵyl kóshirýge týra keldi. Adamdar avtobýstarmen, jeńil kóliktermen, tipti balyqshylardyń qaıyqtarymen qaýipsiz aımaqtarǵa shyǵaryldy.

Eń kúrdeli jaǵdaı Aheıa, Preveza, Ion araldary men Hıos aralynda tirkelip otyr. Euronews málimetinshe, tilsiz jaýmen kúreske 5 myńǵa jýyq órt sóndirýshi men 33 ushaq jumyldyrylǵan. Qutqarý qyzmetiniń birneshe ókili jaraqat alyp, aýrýhanaǵa túsken.

«Bul kúnder sońǵy jyldardaǵy órt sóndirýshiler úshin eń aýyr synaqqa aınaldy», — dedi Grekııa órt sóndirýshiler odaǵynyń tóraǵasy.

Jalyn tek Grekııany ǵana sharpyp turǵan joq. Shilde aıynyń sońynda Túrkııa men Kıprde de orman órtteri tutanyp, týrıstik aımaqtarǵa qaýip tóndirgen edi.