Gúlmıra Satybaldy soty: kýágerler keıin qaıtys bolǵan maskúnemniń atyna kompanııa qalaı tirkelgenin aıtty

Almatyda Gúlmıra Satybaldyǵa qatysty sot proesi jalǵasyp jatyr. Baur Kazakhstan uıymynyń burynǵy zańgeri Dinmuhamed Jumadilda búgin sotta jaýap berdi,-dep habarlaıdy Qandastar.kz

Sotta kýáger Baur Kazakhstan AQ quramyndaǵy BAUR Development Group JShS (quryltaıshylary Gúlmıra Satybaldy men jábirlenýshi Abaı Júnisov bolǵan kompanııa – red. eskertpesi) Muqashevtyń atyna qalaı ótkenin aıtyp berdi. Buǵan deıin seriktestiktiń dırektory Nurlan Dosqalı bolǵan. «2020 jylǵy jeltoqsanda Nurlan Dosqalı maǵan habarlasyp, BAUR Development Group kompanııasymen hat almasqanyn, mámile boıynsha birge barýymdy surady. Notarıýs ofıske kelsin dedim.

Sol kezde Muqashev belgisiz eki adammen keldi. Sosyn olar «mine – satyp alýshy» dep onyń jeke kýáligin alyp, notarıýsqa aparyp, kelisimshartqa sol jerde qol qoıdy», – dedi kýáger. Sonymen qatar kýáger BAUR Development Group kompanııasyn naqty kim basqarǵanyn bilmeıdi. Budan keıin jábirlenýshiniń ókili kýágerdiń Muqashevtyń buryn sottalǵanyn jáne uzaq merzimge jazasyn ótegenin, sondaı-aq naqty turǵylyqty jeri joq ekenin bile me, joq pa dep surady. Jumadilda Muqashevtyń sottylyǵy týraly men keıinirek bildim deıdi. «Ol keńsege kelgende, uqypty jınaqy kıimmen boldy.

Eshqandaı kudik týǵyzbady. Keıin onyń bazada turǵanyn bildim», – dep jaýap berdi. Olar Muqashev týraly ótken sot otyrysynda sóz etken.

Odan keıin 2014 jyldan beri Baur Kazakhstan quramyna kiretin kompanııalarda túrli laýazymdardy atqarǵan kýáger Talant Ermahannan ólimi týraly aıtty. Kýáger Muqashevqa óndiristik bazada tósek daıyndap berý týraly tapsyrma berilgenin aıtty. «Osyǵan deıin de bazada bir-eki ret boldym, oǵan Dosqalı Nurlannyń atynan tamaq berdim de, bir aıǵa jýyq ýaqyt ótken soń men ony notarıýske aparyp keldim. Qaıtadan bazaǵa apardym.

Muqashevpen birge taǵy bir adam bar edi, ekeýi de maskúnemdikke beıim jáne jıi ishetin adamdar ekeni meni tańǵaldyrǵan edi. Arada 1-2 kúnnen keıin qoıma meńgerýshisi Baýyrjan Momyshev telefon soǵyp, Muqashevtyń aýyryp jatqanyn aıtty.

Eki saǵattan keıin maǵan Nurlan Dosqalıdyń ózi telefon soǵyp, Muqashevtyń qaıtys bolǵanyn habarlady.

Men qala syrtynda boldym, kele almaıtynymdy aıttym. Artynsha Momyshev Jumadildanyń kelgenin (ol kezde Baur Kazakhstan advokaty – avtordyń eskertpesi) jedel járdem kútip turǵanyn aıtty. Ary qaraı bilmeımin», – deıdi Talant Ermahan.

Kýágerge suraq qoıǵan jábirlenýshiniń ókili notarıýsqa barǵan kezde Muqashev BAUR Development Group kompanııasynyń dırektory bolǵanyn atap ótti. Muqashevtyń ózi buǵan deıin isti bolyp, 10 jyldan astam merzimge sottalǵan. Kýáger bul týraly eshteńe bilmeıtinin aıtty.