Gúlmıra Satybaldyǵa taǵy bir aıyp taǵyldy

Foto: vıdeodan kadr

Olıgarh Qaırat Satybaldynyń burynǵy jubaıy Gúlmıra Satybaldy taǵy bir qylmystyq is boıynsha kúdikti dep tanyldy, dep habarlaıdy qandastar.kz

Belgili bolǵandaı Gúlmıra Satybaldy turǵyn úı kesheniniń qurlysy kezinde zańsyz áreketterge bardy dep kúdiktelýde.

«Sybaılas jemqorlyqqa qarsy qyzmet Satybaldy G.K. men basqa da tulǵalarǵa qatysty Vostochka kópfýnkıonaldy turǵyn úı kesheniniń qurylysy barysynda zańsyz áreketter jasaý faktisi boıynsha qylmystyq isti tergep jatyr», – delingen sybaılas jemqorlyqqa qarsy is-qımyl agenttiginiń habarlamasynda.

Eske salsaq, osyǵan deıin Nazarbaevtyń eks-kelini Gúlmıra Satybaldyǵa sot úkimi shyqqan edi. Almatynyń qylmystyq ister jónindegi mamandandyrylǵan aýdanaralyq soty Gúlmıra Satybaldyǵa 12 jylǵa bas bostandyǵynan aıyrý jazasyn taǵaıyndaǵan.

Gúlmıra Satybaldyǵa Qylmystyq kodekstiń úsh baby boıynsha quqyq buzýshylyq jasady degen aıyp taǵylǵan. Gúlmıra Satybaldynyń burynǵy kúıeý balasy Abaı Júnisov onyń nusqaýymen 2019 jyldyń 13 aqpanynan shildesine deıin alty aı boıy óz erkinen tys úıqamaqta ustalǵanyn aıtyp, sotqa júgingen. Sonymen qatar ol Qaırat Satybaldynyń burynǵy áıelin olardyń ortaq bıznesi – Baur Kazakhstan AQ aktıvterin tartyp aldy dep aıyptaǵan.