الەم جاڭالىقتارى
گۇلنارا كارىموۆانىڭ 182 ملن دوللار اكتيۆى وزبەكستانعا قايتارىلادى
فوتو:Ulysmedia.kz كوللاجى
شۆەيتساريا مەن وزبەكستان گۇلنارا كارىموۆانىڭ تاركىلەنگەن اكتيۆتەرىن قايتارۋ تۋرالى كەلىسىمگە قول قويدى, دەپ حابارلايدى qandastar.kz
Ulysmedia.kz.جازعانداي, وزبەكستاننىڭ ادىلەت مينيسترلىگىنىڭ مالىمەتىنشە, 6 اقپاندا قول قويىلعان كەلىسىم اياسىندا 182 ميلليون دوللار كولەمىندەگى قاراجات شۆەيتساريادان وزبەكستانعا اۋدارىلادى. بۇل قاراجات الەۋمەتتىك ماڭىزى بار جوبالارعا جۇمسالادى.
— قاراجات وزبەكستاننىڭ جەكەلەگەن ازاماتتارى تاراپىنان زاڭسىز جولمەن الىنعان جانە 2012 جىلى شۆەيتساريانىڭ باس پروكۋراتۋراسى گۇلنارا كارىموۆاعا قاتىستى قىلمىستىق ءىس اياسىندا تولىعىمەن تاركىلەنگەن, – دەپ مالىمدەدى وزبەكستاننىڭ ادىلەت مينيسترلىگى.
گۇلنارا كارىموۆا — وزبەكستاننىڭ تۇڭعىش پرەزيدەنتى يسلام كاريموۆتىڭ ۇلكەن قىزى. 2013 جىلدان باستاپ گۇلنارا كارىموۆاعا قاتىستى سىبايلاس جەمقورلىق جانە اقشانى جىلىستاتۋ ايىپتارى بويىنشا تەرگەۋلەر جۇرگىزىلدى. 2015 جىلى ول ۇرلىق جانە بوپسالاۋ ايىپتارى بويىنشا 5 جىلعا باس بوستاندىعىن شەكتەۋ جازاسىنا كەسىلدى. 2017 جىلى جاڭا ايىپتار تاعىلىپ, 10 جىلعا باس بوستاندىعىنان ايىرىلدى, كەيىن بۇل جازا 5 جىلعا ۇيقاماققا اۋىستىرىلدى. 2019 جىلى ۇيقاماق شارتتارىن بۇزعانى ءۇشىن جالپى رەجيمدەگى كولونياعا اۋىستىرىلدى. 2020 جىلى تاشكەنت قالالىق سوتى ونى قاستاندىق, بوپسالاۋ, ىسىراپ ەتۋ جانە اقشانى جىلىستاتۋ سياقتى ايىپتار بويىنشا 13 جىل 4 ايعا باس بوستاندىعىنان ايىردى.
2024 جىلدىڭ جەلتوقسانىندا گۇلنارا كارىموۆا تاشكەنت وبلىسىنىڭ زانگياتا اۋدانىنداعى ايەلدەر كولونياسىنان سول اۋداننىڭ كولونيا-قونىسىنا اۋىستىرىلدى.
شۆەيتساريا پروكۋراتۋراسى گۇلنارا كارىموۆانى حالىقارالىق قىلمىستىق ۇيىمدى باسقاردى جانە اقشانى جىلىستاتتى دەپ ايىپتادى.
