حاديشا اداي: ەلگە ورالۋ ءار قازاقتىڭ ارمانى

فوتو جەكە قورىنان

تاۋەلسىزدىك قارساڭىندا اتامەكەنگە ورالعان قانداستاردىڭ تىنىس-تىرشىلىگىن ءبىلۋ رەداكتسيانىڭ ماقساتى. بۇگىن qandastar.kz يرانداعى كوشتى باستاپ كەلگەن حاديشا ادايمەن تىلدەستى.

ونىڭ ايتۋىنشا, ەلگە ورالۋ شالعايدا جۇرگەن ءاربىر قازاقتىڭ ارمانى. كەيىپكەرىمىز دە بالا كەزدەن قازاقستانعا تابانىم ءتيىپ, قۇتتى قونىس تاپسام دەپ ارمانداعان.

«كوشۋ ءوزىمنىڭ عانا ەمەس, بالالارىمنىڭ بولاشاعىن جارقىن ەتۋگە مۇمكىندىك بەرەتىنىن تولىق سەزىندىم. سودان بولار, قازاقستانعا كوشۋگە ىقىلاس تانىتقان ساتتە بىرگە ساپارعا شىققان ءاربىر وتباسى ەلدىڭ ەرتەڭىنە سەنىممەن قارادى. وسىلايشا 20 وتباسى بولىپ ەلگە كەلىپ, جاڭا ورتاعا ۇيرەنىستىك. قازىر پەتروپاۆل وبلىسى ەسىل اۋدانىنا قاراستى پەتروۆكا اۋىلىنىڭ تۇرعىنىمىز», – دەيدى ول.

حاديشاعا باستاپقىدا قونىس اۋدارۋعا ءتورت ايماق ۇسىنىلعان. ولاردىڭ قاتارىندا سەمەي, كوكشەتاۋ, پەتروپاۆل, پاۆلودار, قوستاناي سەكىلدى قالالار بار. كەيبىرىندە باسپانا ءازىر بولماسا, كەيبىر قالانىڭ اۋا-رايى, تابيعاتى جاقپاعان. كەيىن ويلانا كەلە سولتۇستىك قازاقستانعا توقتالىپتى. تاڭداۋدىڭ سەبەبى, اۋىلدا مال شارۋاشىلىعىمەن اينالىسۋعا بارلىق جاعداي جاسالعان كورىنەدى. ونىڭ ۇستىنە يراننان قويدىڭ ءجۇنىن يىرەتىن قۇرىلعىنى قوسا اكەلىپتى.

كەيىپكەرىمىزگە «قازاقستان ءسىز كۇتكەندەي قارسى الدى ما? دەگەن ماڭىزدى سۇراق قويعان ەدىك.

«بۇل ساۋال مەنى ءتۇرلى سەزىمگە جەتەلەيدى. كەي تۇستا كوڭىلگە كىربىڭ تۇسكەن ءسات بولعانمەن, سانامداعى قازاق ۇعىمى ەش وزگەرىسسىز قالدى. كەلگەن ساتتە كۆوتا ءبولۋ, كاسىپ باستاۋعا گرانت بەرۋ, جۇمىسقا ورنالاستىرۋ سەكىلدى شارالار دا باسەڭدەپ قالدى. وقۋ بىتىرگەنىن راستايتىن ديپلومىن اكەلمەگەن نەمەسە زاڭدى مامانمەن بەكىتىلمەگەن ازاماتتار كۇندەلىكتى جۇمىس ىستەپ كۇن كورۋدە. قانداستاردىڭ تۇراقتى جۇمىسى بولماعاندىقتان كەيدە ازىق-ت ۇلىككە قارجىسى بولماي قالادى. ونداي ساتتە اۋىل تۇرعىندارى, اكىمدىك وكىلدەرى, قايىرىمدى جاندار جاردەمدەسىپ, بارىنشا كومەك قولىن سوزىپ كەلەدى. دەگەنمەن, جۇمىسپەن قامتۋ ماسەلەسى وڭالماي, جاعدايدىڭ قالىپقا كەلمەسى بەلگىلى»,  – دەيدى ح.اداي.

كەيىپكەرىمىز ءتىل ماسەلەسىنە كەلگەندە تۇيتكىل جوعىن العا تارتىپ وتىر. «بالالارىم وقۋعا قۇشتار. ەكى بالام اعىلشىن, پارسى تىلدەرىن جەتىك بىلەدى. قازاق ءتىلىن دە ۇيرەنىپ كەلەدى. يراندا قازاقشا سويلەسىپ, وي بولىسەتىن ورتانىڭ جوقتىعى ءبىرشاما كەدەرگى كەلتىرگەن ەدى. قازىر قاتارلاستارىمەن اڭگىمە ايتىپ, ءتىل ۇيرەنۋدى ءبىر ىزگە ءتۇسىردى», – دەيدى ول.

P.S  يراندا 200-دەن اسا قازاق وتباسى قالعانىن بىلدىك. ولار دا مۇمكىندىك بولسا ەلگە كەلۋدى ويلايدى.  جول شىعىنى, قۇجاتتاردى اۋدارۋ, بەكىتۋگە كەتەتىن شىعىندى كوپتىڭ قالتاسى كوتەرمەيدى. بيلىك قانشا جەردەن كومەك كورسەتكەنىمەن وتباسىنىڭ قارجى قورى جيناقتالماسا, جاڭا ورتادا ءومىر ءسۇرۋ جەڭىل ەمەس ەكەنى تۇسىنىكتى.